काठमाडौँ । राष्ट्रिय स्वतन्त्र पार्टी (रास्वपा)ले केन्द्रीय समिति बैठक आह्वान गरेको छ । पार्टीले चैत १२ गते बिहीबार अपराह्न ४ बजे केन्द्रीय कार्यालय चःमतिमा बैठक बस्ने जनाएको छ ।
पार्टीका प्रवक्ता मनिष झाले बैठकमा संसदीय दलको नेता चयन गर्ने विषयमा छलफल हुने जानकारी दिएका छन् । नवनिर्वाचित सांसदहरूको शपथ ग्रहणलगत्तै बस्ने यस बैठकलाई महत्त्वपूर्ण मानिएको छ । संसद सचिवालयले पनि बिहीबार नै नवनिर्वाचित सांसदहरूको पद तथा गोपनीयताको शपथ गराउने तयारी गरेको छ । त्यसपछि रास्वपाले केन्द्रीय समिति बैठकमार्फत दलको नेतृत्व टुंग्याउने योजना बनाएको हो ।
रास्वपाले निर्वाचनअघि नै वरिष्ठ नेता बालेन शाहलाई प्रधानमन्त्रीका उम्मेदवारका रूपमा अघि सारेको थियो । सोही अनुसार उनलाई संसदीय दलको नेता चयन गर्ने तयारी भइरहेको नेताहरूले बताएका छन् । हालको विधानअनुसार संसदीय दलको नेता चयनका लागि उम्मेदवारहरूबीच निर्वाचन हुने व्यवस्था रहेको छ, जसमा पार्टीका साधारण सदस्यहरू पनि मतदाता हुन पाउने प्रावधान छ । तर, यसलाई परिमार्जन गर्दै वरिष्ठ नेतालाई प्रत्यक्ष प्रस्ताव गरेर नेता चयन गर्ने विषयमा पनि छलफल हुने बताइएको छ ।
हालै सम्पन्न प्रतिनिधिसभा निर्वाचनमा रास्वपाले झण्डै दुई तिहाइ समर्थन प्राप्त गरेको छ । त्यसैले पार्टीभित्र नेतृत्व चयन प्रक्रिया सहज हुने अपेक्षा गरिएको छ । यो बैठकबाट रास्वपाको संसदीय दलको नेता चयन हुने र त्यसले आगामी सरकार गठनको प्रक्रियालाई समेत प्रभावित गर्ने देखिएको छ
