काठमाडौं। आमूल परिवर्तन रिपब्लिकन पार्टी नेपालका अध्यक्ष भरत गिरीले नेपालमा करिब ३० लाखको सङ्ख्यामा रहेको ख्रीस्टियन समुदायको राज्य संरचनामा प्रतिनिधित्व नभएको विषय उठाउँदै गम्भीर प्रश्न गरेका छन्।
उनले हालै देशमा आएको राजनीतिक परिवर्तन र “नयाँ राजनीति” को नाराबीच पनि ख्रीस्टियन समुदायको प्रतिनिधित्वको विषय कसैको प्राथमिकतामा नपरेको बताएका हुन्।
गिरीले देशमा आम निर्वाचनपछि गैरराजनीतिक पृष्ठभूमिका व्यक्तिहरू नेतृत्वमा पुगेको र नयाँ अनुहारहरूले सरकार चलाउने अवसर पाएको उल्लेख गर्दै परिवर्तन र समावेशिताको नारा दिने शक्तिहरूले यति ठूलो समुदायको प्रतिनिधित्वबारे चासो नदेखाएकोप्रति आश्चर्य व्यक्त गरेका छन्।
उनका अनुसार नेपालका ख्रीस्टियनहरू पनि यस देशका समान नागरिक भएकाले राज्यका सबै तहमा उनीहरूको सम्मानजनक र न्यायोचित प्रतिनिधित्व सुनिश्चित हुनुपर्नेछ। “सबै जनताको आवाज बन्ने दाबी गर्ने राजनीतिक शक्ति र नेताहरूले ख्रीस्टियन समुदायको अस्तित्व र अधिकारलाई बेवास्ता गर्नु आफैंमा ठूलो विडम्बना हो,” उनले उल्लेख गरेका छन्।
गिरीले नेपाल कुनै एक धर्म वा समुदायको मात्र देश नभई सबै नेपालीहरूको साझा देश भएको उल्लेख गर्दै राज्य सञ्चालन र नीति निर्माणमा सबै समुदायलाई समान अवसर र सम्मान दिनुपर्ने बताएका छन्।
उनले करिब ३० लाखको सङ्ख्यामा रहेको ख्रीस्टियन समुदायलाई निरन्तर बेवास्ता गरिनु लोकतन्त्र र समावेशिताको मूल सिद्धान्तविपरीत हुने चेतावनी दिएका छन्।
“अब समय आएको छ—यो विभेदलाई चुनौती दिने, न्यायपूर्ण प्रतिनिधित्वको माग गर्ने र सबै समुदायलाई समान सम्मान दिलाउने,” उनले भनेका छन्।
गिरीको यस धारणा सार्वजनिक भएपछि धार्मिक तथा सामाजिक समावेशिताको विषयमा नयाँ बहस सुरु हुने अपेक्षा गरिएको छ।
