खोटाङ । खोटाङमा जिल्ला ट्राफिक प्रहरी कार्यालयद्धारा गत आ.व.२०८१/८२ मा ४९ लाख बढी राजस्व संकलन गरेको जनाएको छ ।गत आर्थिक वर्ष २०८१/८२ मा सवारी कारबाहीबाट रु ४९ लाख ३१ हजार ५०० राजस्व सङ्कलन गरेको छ । गत वर्षको साउन–१ गतेदेखि असार मसान्तसम्ममा ट्राफिक नियम उल्लङ्घन गर्ने पाँच हजार ७४७ वटा सवारी साधन कारबाहीमा पर्दा उक्त राजस्व रकम सङ्कलन भएको हो ।
जिल्लामा सञ्चालित तीन हजार ११५ वटा कार, जिप तथा भ्यानलाई कारबाही गर्दा रु ३६ लाख ७७ हजार, एक हजार ३४६ वटा मोटरसाईकलबाट रु ११ लाख ५६ हजार ५००, ५७७ वटा ट्रकबाट रु पाँच लाख २० हजार, १३६ वटा बसबाट रु एक लाख २१ हजार ५०० राजस्व सङ्कलन भएको जिल्ला ट्राफिक प्रहरी कार्यालय खोटाङका प्रमुख प्रहरी सहायक निरीक्षक पितम राईले जानकारी दिनुभएको छ ।
यस्तै, ९८ वटा ट्रिपरबाट रु ८६ हजार ५००, ३५७ ट्याक्टरबाट रु दुई लाख ८२ हजार, ११७ वटा टेम्पो कारबाहीबाट रु एक लाख पाँच हजार राजस्व सङ्कलन भएको ट्राफिक प्रहरीले जनाएको छ ।
ट्राफिक नियम उल्लङ्घन गर्ने सवारी साधनलाई कारबाही गर्दा सबैभन्दा बढी गत वर्षको कातिक महिनामा रु सात लाख ५१ हजार ५०० राज्यकोषमा राजस्व सङ्कलन भएको जनाइएको छ । कातिक महिनामा साना÷ठूलागरी ८४४ वटा सवारी साधन कारबाहीमा परेको ट्राफिक प्रहरीले जनाएको छ ।
आर्थिक वर्ष ०८१/८२ मा सवारी साधन दुर्घटनाबाट छ जनाले ज्यान गुमाएको जिल्ला प्रहरी कार्यालय खोटाङका प्रमुख प्रहरी नायब उपरीक्षक प्रतीक विष्टले जानकारी दिनुभएको छ । प्रनाउ विष्टले दिनुभएको जानकारीअनुसार जिल्लाका विभिन्न ठाउँ तथा विभिन्न समयमा भएको १३३ वटा सवारी दुर्घटनामा १३६ जना घाइते भएका छन् ।
ट्राफिक नियम उल्लङ्घन गर्ने चालक, सहचालक र सवारी धनीलाई कारबाहीसँगै दुर्घटना न्यूनीकरण गर्नका लागि ट्राफिक नियम पालना सम्बन्धी जानकारी दिन विभिन्न ठाउँमा प्रशिक्षण कार्यक्रमसमेत सञ्चालन गर्ने गरिएको जनाइएको छ ।
यात्रुबाहक साना/ठूला जुनसुकै सवारी साधनले अनिवार्य रुट पर्मिट (सम्बन्धित सडकका लागि सवारी अनुमतिपत्र) लिनुपर्ने कानूनी प्रावधान रहेको छ । बिना रुट पर्मिट सञ्चालित यातायातमा सवार व्यक्ति दुर्घटना भएर घाइते भएको खण्डमा उपचार खर्च स्वयम् व्यक्ति तथा परिवारले व्यहोर्नुपर्ने सवारी नियममा उल्लेख रहेको जनाइएको छ
