काठमाडौं । पूर्वराष्ट्रपति विद्यादेवी भण्डारीले जननेता मदन भण्डारीले देखेको सामाजिक न्याय, समानता र समृद्ध समाजको सपना अधुरै रहेको बताएकी छन्।
उनले उक्त सपनालाई साकार पार्न सबैले मदन भण्डारीको विचारलाई व्यवहारमा उतार्न थप सक्रियता देखाउनुपर्नेमा जोड दिइन्।
शनिबार मदन भण्डारी फाउन्डेशनद्वारा आयोजित ‘जननेता मदन भण्डारीको ७४ औं जन्मजयन्ती’ को अवसरमा आयोजित समारोहलाई सम्बोधन गर्दै उनले यस्तो बताएकी हुन्।
पूर्वराष्ट्रपति भण्डारीले भनिन्, ‘मदनका सपनाहरू साकार पार्ने दिशामा अग्रसर तपाईंहरूको साथमा म आफू पनि सँगै रहने प्रतिबद्धता व्यक्त गर्दछु।’
उनले मदन भण्डारीको निधनपछि आफू शोकमा डुबेका बेला पार्टीले काठमाडौंको उपनिर्वाचनमा उम्मेदवार बनाएको स्मरण गर्दै भनिन् ‘यस राजनीतिक घटनाले मेरो पहिलो जन्म आमा–बुबाले दिनुभएको र दोस्रो जन्म विद्या भण्डारीको रूपमा काठमाडौंका जनताले दिए भन्ने अनुभूति त्यसबेलै मैले गरेकी थिएँ।’
पूर्वराष्ट्रपति भण्डारीले आफूले पार्टी सदस्यता नवीकरण गरी पुनः नेकपा (एमाले) परिवारको एक सदस्यको रूपमा जोडिएकोमा गर्व महसुस गरेको बताइन्। ‘मेरो कुनै विशिष्ट महत्वाकांक्षा छैन। देश र जनताको हित नै मेरो ध्येय र लक्ष्य हो,’ उनले भनिन्।
उनले मदन भण्डारीको ‘राजनीतिमा थकाई भन्ने शब्दावली हुँदैन’ भन्ने भनाइलाई स्मरण गर्दै आफू सोही आदर्शमा समर्पित रहने प्रतिबद्धता व्यक्त गरिन्।
उनले जनताको बहुदलीय जनवाद (जबज) लाई नेपाली माटोमा उत्पत्ति र विकास भएको मौलिक राजनीतिक-वैचारिक सिद्धान्तको रूपमा व्याख्या गरिन्।
कार्यक्रममा प्रधानमन्त्री तथा नेकपा (एमाले) का अध्यक्ष केपी शर्मा ओलीसहित पार्टीका शीर्ष नेता तथा कार्यकर्ताहरूको बाक्लो उपस्थिति रहेको थियो
