मेवालाल यादब, राैतहट। रौतहट जिल्लाको बौधिनाइ नगरपालिका–५ स्थित कोपवा छठ घाटमा देखिएको व्यापक अनियमितता र भ्रष्टाचारमा संलग्न भएको आरोप लागेका बसन्त कुशवाहालाई मधेश प्रदेशको पर्यटन मन्त्री पदका लागि सिफारिस गरिएको छ।
स्थानीय स्तरमा कोपवा छठ घाट निर्माण तथा व्यवस्थापनमा करोडौंको बजेट खर्च हुँदाहुँदै पनि अपेक्षित काम नहुँदा नागरिकहरूबाट आलोचना हुँदै आएको छ। सो परियोजनामा आर्थिक पारदर्शिता नहुँदा बसन्त कुशवाहाको नाम प्रमुख रूपमा मुछिएको हो।
यस्तो विवादास्पद पृष्ठभूमिका व्यक्ति मन्त्री पदमा सिफारिस भएसँगै प्रदेश सरकारको निर्णयप्रति सर्वत्र प्रश्न उठ्न थालेको छ। स्थानीय नागरिक, सामाजिक अभियन्ता तथा विपक्षी दलहरूले यसलाई ‘नैतिक संकट’ को संज्ञा दिएका छन्।
प्रदेश सरकारले भने सिफारिस प्रक्रियालाई कानूनी ढाँचामा अगाडि बढाइएको बताएको छ। यद्यपि, बसन्त कुशवाहा उपरको आरोपमा छानबिन अगाडि नबढाई मन्त्री पदमा पुर्याइनु गलत सन्देश दिन सक्ने विश्लेषकहरूको भनाइ छ।
