काठमाडौं । लामो समयदेखि राजनीतिक रस्साकस्सी र ढिलाइका बीचमा अड्किएको नेपाल राष्ट्र बैंकको गभर्नर नियुक्ति अन्ततः टुंगिएको छ। मंगलबार साँझ बसेको मन्त्रिपरिषद् बैठकले अर्थशास्त्री डा. विश्व पौडेललाई राष्ट्र बैंकको १८औँ गभर्नरमा नियुक्त गर्ने निर्णय गरेको हो। मन्त्रिपरिषद् निर्णयबारे जानकारी दिँदै सरकारका प्रवक्ता तथा सञ्चारमन्त्री पृथ्वीसुब्बा गुरुङले पौडेलको नियुक्ति सार्वजनिक गरेका हुन्।
गभर्नर नियुक्तिको विषयमा मंगलबार प्रधानमन्त्री केपी शर्मा ओली र नेपाली कांग्रेसका सभापति शेरबहादुर देउवाबीच निर्णायक छलफल भएको थियो। छलफलमा अर्थमन्त्री विष्णु पौडेल र गृहमन्त्री रमेश लेखक पनि सहभागी थिए। त्यसपछि अर्थमन्त्री पौडेलको संयोजकत्वमा बसेको सिफारिस समितिको बैठकले डा. पौडेलको नाम अगाडि सारेको थियो।
राष्ट्रिय योजना आयोगका उपाध्यक्ष रहिसकेका डा. पौडेल चितवनका बासिन्दा हुन्। उनले २०७९ को संसदीय चुनावमा चितवन क्षेत्र नम्बर १ बाट कांग्रेसका उम्मेदवारका रूपमा प्रतिस्पर्धा गरेका थिए, तर तेस्रो स्थानमा सीमित भएका थिए। योजना आयोगमा कार्यरत रहँदा उनले नीतिगत सुधार, विकास योजनाको तर्जुमा र दीर्घकालीन रणनीतिमा उल्लेखनीय भूमिका खेलेका थिए।
गभर्नर नियुक्तिमा देखिएको लामो ढिलाइ र राजनीतिक दबाबबीच पौडेलको चयनले सरकारलाई आलोचनाबाट केही राहत मिल्ने देखिएको छ। कांग्रेस सभापति देउवाले यसअघि नै गभर्नर पद कांग्रेसको भागबण्डामा पर्ने सहमति भएको र नियुक्ति ढिलाइमा प्रधानमन्त्रीको हात नरहेको स्पष्ट पारेका थिए। अब डा. पौडेलको नेतृत्वमा राष्ट्र बैंकले मौद्रिक नीतिमा स्थायित्व र सुधारको अपेक्षा बोकेको छ।
