By Dikendra
झापा । नेपाली कांग्रेसकी केन्द्रीय सदस्य महेन्द्रकुमारी लिम्बूले दमक बहुमुखी क्याम्पसको स्ववियू निर्वाचनमा संगठनविपरीत गतिविधि गर्नेहरूलाई कारवाही गर्ने चेतावनी दिएकी छन्।
नेविसंघ इकाई समितिले दमकमा आज आयोजना गरेको पत्रकार सम्मेलनमा बोल्दै उनले स्ववियू निर्वाचनमा एकपक्षीय तथा संगठनको मर्मविपरीत गतिविधि गर्ने नेता-कार्यकर्तालाई कारवाही गरिने बताइन्। नेविसंघमा देखिएको विवादबारे बोल्दै उनले कांग्रेस प्रदेशसभा सभापति रवि केसीलगायतका नेताहरूको नामै उल्लेख गर्दै पार्टी हितविपरीत गतिविधि गर्नेहरू कांग्रेस कार्यकर्ता नभएको धारणा राखिन्।
नेविसंघ इकाई समितिले सायन साम्पाङ राईलाई अध्यक्ष पदका उम्मेदवारका रूपमा अघि सारेको बताउँदै लिम्बूले विद्यार्थी निर्वाचनमा पार्टीले हस्तक्षेप गर्नु नहुने जिकिर गरिन्।
पत्रकार सम्मेलनमा नेविसंघ झापाका जिल्ला सभापति सञ्जय निरौलाले स्ववियू निर्वाचनका क्रममा दमकमा देखिएको आधिकारिकता विवाद पार्टीकै कारण उत्पन्न भएको बताए। भोलि (चैत ५ गते) हुने स्ववियू निर्वाचनमा दमकमा सायन राईको उम्मेदवारी मात्र आधिकारिक भएकाले उनलाई जिताउन विद्यार्थी नेतृत्व तथा सदस्यहरूलाई निर्देशन दिए। उनले स्ववियूमा उम्मेदवार छान्ने अधिकार स्वयम् विद्यार्थीहरूकै हुने भएकाले त्यसमा पार्टीको हस्तक्षेप स्वीकार्य नहुने धारणा राखे। साथै, स्ववियू अध्यक्ष पदका अर्का प्रत्याशी भुवन बस्नेतको उम्मेदवारी घोषणा नेविसंघको मात्र नभई जिल्ला पार्टीको निर्णयविपरीत भएको भन्दै, त्यस्तो गुटगत भूमिका निर्वाह गर्ने प्रदेशसभा सभापति रवि केसीसहितका नेताहरूलाई कारवाही गरिनुपर्ने माग गरे।
यसअघि पाँचदलीय गठबन्धनसहितको विद्यार्थी संगठनले बस्नेतको अध्यक्षतामा संयुक्त प्यानल सार्वजनिक गरेको थियो।
सायन राईको उम्मेदवारी घोषणा सभामा कांग्रेस दमक नगर सभापति प्रकाश प्रसाईले स्ववियू निर्वाचनमा उम्मेदवार चयन गर्ने अधिकार स्ववियू संगठनका सदस्यहरूकै हुनुपर्ने बताए। नेविसंघबाट सायनको उम्मेदवारी आधिकारिक भएकाले सबै विद्यार्थीहरू एकजुट भएर उनलाई जिताउनुपर्नेमा उनले जोड दिए।
सो अवसरमा उम्मेदवार राईले आफू नेविसंघबाट दल दर्ता गरिसकेको भन्दै त्यसलाई अस्वीकार गर्ने कार्य उपयुक्त नहुने बताए। उनले स्ववियूमा गफ होइन, काम गरेर देखाउने प्रतिवद्धता व्यक्त गरे।
दमक स्ववियू निर्वाचनमा अध्यक्ष पदका लागि नेविसंघकै तीनसहित आठ जनाले उम्मेदवारी दर्ता गराएका छन्। नेविसंघबाट भुवन बस्नेत, सायन राई र दिपक लिम्बूले उम्मेदवारी दिएका थिए। स्ववियू सचिव समेत रहेका लिम्बूले सामाजिक सञ्जालमा पोष्ट गर्दै आफ्नो उम्मेदवारी फिर्ता लिएको घोषणा गरेका छन्।
स्थानीय जोङ्री क्याफेमा आयोजित पत्रकार सम्मेलनमा नेविसंघ झापाका पदाधिकारी, पूर्व पदाधिकारी तथा विद्यार्थीहरूको उल्लेखनीय उपस्थिति रहेको थियो। उक्त कार्यक्रम नेविसंघ दमक बहुमुखी क्याम्पस इकाई सभापति सुनिल हाताछु राईको अध्यक्षतामा सम्पन्न भएको थियो।
