काठमाडौं । कोशी प्रदेशसभा सदस्य गोम्बु शेर्पाले पाथीभरामा निर्माणाधीन केबलकारको काम स्थगित गरेर सरोकारवालासँग वार्ता गर्न सरकारलाई आग्रह गरेका छन्।
शुक्रबार (आज) बसेको प्रदेशसभा बैठकमा भाग लिँदै सांसद शेर्पाले यस्तो बताएका हुन्। ‘केबलकारको काम स्थगित गरेर सरोकारवालासँग इमान्दारीपूर्वक वार्ता गरेर निकास निकालियोस्,’ उनले भने।
सरकारले कुनै ठेक्का विशेषका लागि जबरजस्ती रूपमा मुडभेद निम्त्याउन चाहेको उनको आरोप छ। उनले सोधे, ‘जनतालाई दमन गरेर, गोली हानेर सरकारले कस्तो विकास चाहेको हो ? के सरकारले साँच्चै मुडभेद निम्त्याउन चाहेको हो ? साँच्चै जनतासँग सिङ जुधाउन चाहेको हो ? विश्वको र नेपालकै पनि इतिहास कस्तो छ भने जुन शासकले जनतासँग सिङ जुधाएको छ, उनीहरूको असाध्यै नराम्रोसँग सिङ फुक्लिएको र अस्तित्वसमेत नामेट भएको छ।’
नेपालको संविधानको धारा ३२ को उपधारा ३ ले नेपालमा बस्ने प्रत्येक नेपाली जनसमुदायलाई आफ्नो भाषा, संस्कृति, लिपि, सांस्कृतिक सभ्यता र सम्पदाको संरक्षण गर्ने हकको सुनिश्चितता गरेको उल्लेख गर्दै उनले भने, ‘विकास भनेको जनताका लागि गर्ने कुरा हो। र, त्यहाँ जनताको असन्तुष्टि रह्यो भने त्यहाँ सरकारले त्यसलाई गम्भीर रूपमा लिएर पुनर्विचार गर्न जरुरी रहन्छ।’
