काठमाडौं । नेपाल बचत तथा ऋण केन्द्रीय सहकारी संघ (नेफ्स्कुन)को पौस ७ र ८ गते काठमाडौंको नेपाल प्रज्ञा प्रतिष्ठानमा हुन गइरहेको ३२ औं साधारण सभाले आगामी चार वर्षका लागि नयाँ नेतृत्व चयन गर्ने भएको हुँदा नवमैत्री बचत तथा ऋण सहकारी संस्थाका अध्यक्ष किरण बर्तौलाले नेफ्स्कुन संचालक समिति सदस्य पदका लागि उमेद्वारी दिने घोषणा गरेका छन् ।
विगत ८ वर्षदेखि सहकारी क्षेत्रमा आबद्ध भई सहकारी अभियानमा भूमिका निर्वाह गर्दै आएका वर्तौलाले सहकारी क्षेत्रमा देखिएका बिद्यमान समस्या सतही रूपमा मात्र बाहिर आएको तर नीतिगत रूपमा सम्बोधन हुनुपर्ने धेरै ठाउँ रहेकाले त्यसका लागि पहलकदमी गर्ने खुड्किलोका रूपमा नेफ्स्कुनमा आफ्नो उमेद्वारी रहेको जानकारी गराए ।
सहकारी ऐन २०७४, सहकारी नियमावली २०७५ जारी भएपश्चात ऐनको कार्यान्वयन पक्ष निकै फितलो रहेको र कार्यान्वयनका पक्षधरहरू सहकारी नियामक निकाय, सहकारी अभियन्ता र सम्पूर्ण सहकारीकर्मीहरूको निष्कृयताले हालको समस्या उत्पन्न भएको हुँदा यसको समाधानका लागि सक्रिय भूमिका खेल्न आफूले नेफ्स्कुनामा उमेद्वारी दिएको बताएका छन् ।
व्यवस्थापन संकायमा स्नातकोत्तर गरेका वर्तौला नेफ्स्कुनको चुनाबी मैदानमा देखिएका युवा उमेद्वार हुन् । कानुनी विषय र लेखा सम्बन्धमा पनि विशेष दक्खल राख्ने उनी आफ्नो संस्था नवमैत्री साकोसको संचालनमा पनि अब्बल देखिएका छन् ।
युवा उमेद्वारीले नेफ्स्कुनको यस पटकको चुनावी साधारण सभामा उत्साह थपेको छ । सहकारी ऐन २०७४ ले दिएको व्यवस्था अनुरूप कर्जा सूचना केन्द्र र ऋण असुली न्यायाधीकरणको स्थापना भई सहकारी संचालनमा सहजीकरण गरिनुपर्ने धारणा विभिन्न फोरमहरूमा राख्दै आएका छन् । सहकारी ऐन २०७४ को पूर्ण रूपमा कार्यन्वयन भई संस्था संचालनमा सहजीकरण, कर्जा लगानी/ असुलीमा सहजीकरण, बचतकर्ताको बचत सुरक्षण जस्ता संवेदनशील विषयमा केन्द्रित भई काम गर्ने उद्देश्य राखेका छन् ।
अवसर पाएमा सक्रिय भई सहकारी क्षेत्रको आम समस्या समाधान गर्ने र नीतिगत रूपमा दीर्घकालीन प्रभाव हुने परिवर्तनका लागि योजना रहेको जानकारी गराएका छन् ।
