खाेटाङ।खोटाङमा विभिन्न दलका नेताको वडा तथा पालिकामा फरक दलका उम्मेदवार बिजयी भएका छन् । एमाले प्रमुख सचेतक बिशाल भट्टराईको गृह–पालिका खोटेहाङ गाउँपालिकामा गठबन्धनका उम्मेदवार विजयी भएका छन् ।
खोटेहाङमा माओवादी केन्द्रका उदिमबहादुर राई अध्यक्ष र कांग्रेसका रुपेश राई उपाध्यक्षम विजयी भएका छन् । २०७४ सालको स्थानीय तहको निर्वाचनमा एमाले विजयी भएको सो गाउँपालिकामा एमालेका अध्यक्षका उम्मेदवार कविता राई र उपाध्यक्षका उम्मेदवार राजन बञ्जरा पराजित भएका छन् ।
उदिमबहादुरले ३७२८ र कविताले ३६९० मत पाए । विजयी रुपेशले ३७६३ र राजनले ३३१० मत पाएका छन् । भट्टराईको गृहवडा खोटाङबजारमा भने एमालेका शिवप्रसाद फुयाल विजयी भएका छन् ।
कांग्रेस प्रदेश १ का महामन्त्री भुपेन्द्र राईको गृहपालिकामा कांग्रेसकै उम्मेदवार पराजित भएका छन् । कांग्रेसका उम्मेदवार नइन्द्र राईलाई ६४१ मतले पछि पार्दै एमालेका लोकेन्द्र राई अध्यक्षमा विजयी भएका छन् ।
लोकेन्द्रले २८०३ र नइन्द्रले २१६२ मत पाएका छन् । उपाध्यक्षमा पनि एमालेकै अरुणा थापा मगर २७३३ मत पाएर विजयी बनेकी छन् । उनका निकटतम प्रतिद्धन्द्धी कांग्रेसकी रमा कट्वालले २३१२ मत पाएका छन् । सो पालिकामा २०७४ को निर्वाचनमा भुपेन्द्र अध्यक्षमा विजयी भएका थिए ।
माओवादी केन्द्रका नेता एवं प्रदेश १ का खानेपानी, सिँचाई तथा उर्जा मन्त्री रामकुमार राईको गृहपालिका साकेला गाउँपालिकामा माओवादी केन्द्रका अर्जुनकुमार खड्का पराजित भएका छन् ।
उपाध्यक्षमा माओवादी केन्द्रकी उम्मेदवार बिर्सिका राई विजयी हुँदा खड्का भने कांग्रेसका रबिप्रकाश राईभन्दा पछि परेका हुन् । रबिप्रकाशले १८५० मत ल्याउँदा खड्काले १७७२ मत पाएका छन् ।
खड्का निवर्तमान अध्यक्ष पनि हुन् । यस्तै, बिर्सिकाले २०१२ मत पाउँदा उनका निकटतमप्रतिद्धन्द्धी कांग्रेसका सरिता खड्काले १२२४ मत ल्याएका छन् । उनको गृहवडा रतन्छामा एमालेका जितेन्द्रकुमार राईसँग माओवादी केन्द्रका गौतम राई पछि पारिएका छन् ।
नेकपा एकीकृत समाजवादीका नेता एवं प्रदेश १ का सामाजिक बिकास मन्त्री राजन राईको गृहपालिका केपिलासगढी गाउँपालिकामा कांग्रेससँग नेकपा एकीकृत समाजवादीका उम्मेदवार पराजित भएका छन् ।
नेकपा (एस)का माईतीराज राईलाई पछि पार्दै कांग्रेसका समिर राई अध्यक्षमा विजयी भएका हुन् । समिरले २२४४ मत पाउँदा माइतीराजले १८०८ मत पाए । उपाध्यक्षमा जनता समाजवादीका उम्मेदवार गुरुराज राई विजयी भएका छन् ।
उनले १९८३ मत प्राप्त गरेका छन् । उपाध्यक्षका निकटतम प्रतिद्धन्द्धी एमालेकी मैयाँ सुनुवारले १७६१ मत पाएका छन् । राईको गृहवडा बासपानीमा भने नेकपा (एस)का तुलाराम राई विजयी भएका छन् ।
एमाले नेतृ एबं प्रदेश १ का पुर्वसामाजिक विकास मन्त्री उषाकला राईको वडामा एमाले पराजित भएका छन् । दिक्तेल रुपाकोट मझुवागढी नगरपालिका–४ खाल्लेमा एमालेका डिल्लीकुमार राईलाई माओवादी केन्द्रका खगेन्द्र राईले हराएका छन् । डिल्लीकुमार निवर्तनमा वडाध्यक्ष हुन् ।
कांग्रेस जिल्ला सभापति बिष्णुकुमार राईको वडा दिप्रुङ चुईचुम्मा गाउँपालिका–३ छोरम्बुमा एमालेका भुपेन्द्र बस्नेत विजयी भएका छन् । बस्नेतले ३९५ मत पाउँदा कांग्रेसका महेन्द्र राईले २५५ र माओवादी केन्द्रका उम्मेदवार अजम्बर राईले २७८ मत पाएका छन् ।
