काठमाडौं । नेपाली कांग्रेसका नेता गगनकुमार थापाले नेपाललाई मान्छे बेच्ने, मालसामान भित्र्याउने देश बनेको बताएका छन् । शुक्रबार प्रतिनिधिसभाको बैठकमा आर्थिक वर्ष २०७९र०८० को विनियोजन विधेयकका सिद्धान्त र प्राथमिकतामाथि छलफलमा सहभागी हुँदै उनले ‘नेपाल मान्छे बेच्ने मालसामान भित्र्याउने देश हो ।
हामी मानवीय श्रम विदेश पठाउँछौँ अनि हाम्रो भान्सामा सबै कुरा विदेशबाट ल्याएर चलाउँछौँ ।’
बहुदलपछाडि उद्योग धन्धा बेचेको कुरा गलत भएको भएको भन्दै उनले भने, ‘यसमा गलत भाष्य बनाउन खोजिएको छ । बहुदल पछाडि नै धेरै उद्योग खोलिएका हुन्। बाहिर भने जस्तै निजीकरणका नाममा उद्योग बेचिएको कुरा गलत हो ।’ अर्बौंका सामान विदेशबाट ल्याएर कृषिप्रधान देशको गफ दिइरहेको उनको भनाई थियो । उनले नेपालले आत्मनिर्भर हुने विकल्पमा अघि बढ्नुपर्नेमा जोड दिए ।
