काठमाडौं । बैशाख ३० गते सम्पन्न स्थानीय तह निर्वाचनमा चुनाव लडेका चार पत्रकार पराजित भएका छन् । नवलपरासी पूर्व र पश्चिम जिल्लाबाट स्थानीय तहको निर्वाचन लडेका चार पत्रकार पराजित भएका हुन् ।
चुनाव लड्नेमा पश्चिम नवलपरासीबाट ३ जना वडाअध्यक्ष पदका उम्मेदवार थिए । पूर्वी नवलपरासीबाट गाउँपालिका अध्यक्ष पदका उम्मेदवार थिए ।
पराजित हुनेमा पश्चिम नवलपरासी रामग्राम नगरपालिका–३ बाट एमालेबाट उम्मेदवारी दिएका मेघराज गौतम रहेका छन् । उनी राप्रपाका उम्मेदवारसँग पराजित भए ।
पाल्हीनन्दन गाउँपालिका–२ बाट नेकपा माओवादी केन्द्रबाट उम्मेदवारी दिनु भएका ध्रुब नारायण बाँनिया र सोही वडाबाट नेपाली कांग्रेसबाट उम्मेदवारी दिएका जितेन्द्र गुप्ता पराजित भएका थिए । बाँनिया लोसपाका उम्मेदवारसँग पराजित भए भने गुप्ताले तेस्रो स्थान प्राप्त गरे ।
यस्तै, पूर्वी नवलपरासीको बौदिकाली गाउँपालिकाबाट नेपाली कांग्रेसबाट अध्यक्षमा चुनाव लड्नु भएका खड्क बहादुर राना (केबी) एमालेका उम्मेदवार प्रकाश ओझासँग पराजित भए ।
निष्पक्ष र स्वच्छ पत्रकारिताका लागि चुनाव लड्ने पत्रकारलाई पत्रकार महासंघले स्वैच्छिक राजीनामा दिन आग्रह गरेको थियो । केही जिल्लामा राजीनामा दिएपनि पश्चिम नवलपरासीका पत्रकारले भने दिएका थिएनन् ।
पूर्वी नवलपरासीका रानाले लिखित नदिए पनि राजीनामा दिएको घोषणा गरेको महासंघका जिल्ला उपाध्यक्ष नवीन पौडेलले जानकारी दिए । महासंघको परिपत्र अनुसार चुनाव लड्ने पत्रकारको सदस्यता नरहने जिल्ला शाखाहरुले जनाएका छन् ।
