खाेटाङ। खोटाङको ऐसेलुखर्क गाउँपालिकाको अध्यक्ष एमालेका उम्मेदवार गिरेन्द्रबहादुर राई विजयी भएका छन्।
उनले गठबन्धनबाट उम्मेदवार रहेका नेकपा (माओवादी केन्द्र) का श्रीबहादुर राईलाई १२६ मत अन्तरले पराजित गरेका हुन्। गिरेन्द्रले २ हजार ६०६ मत र श्रीबहादुरले २ हजार ४८० मत प्राप्त गरेको निर्वाचन अधिकृत रमाकान्त यादवले जानकारी दिए।
कांग्रेसका ‘बागी’ उम्मेदवार सन्तवीर तामाङले १ हजार ७ मत प्राप्त गरेका छन्। गाउँपालिका सभापति रहेका तामाङ बागी उठ्दा एमालेका गिरेन्द्रलाई पल्ला भारी भएको हो।
उपाध्यक्षमा गठबन्धनबाट नेपाली कांग्रेसका राजेश राजभण्डारी विजयी भएका छन्। उनले ३ हजार १४६ मत र एमालेकी पुष्पकला भुजेलले २ हजार ५९५ मत प्राप्त गरेकी छन्। भुजेल निवर्तमान उपाध्यक्ष हुन्।
वडाध्यक्षमा पनि मिश्रित परिणाम आएको छ। वडा नम्बर १ मा माआवादी केन्द्रका पुरूषोत्तम राजभण्डारी, २ मा एमालेका नन्दबहादुर तामाङ, ३ मा एमालेका टेकेन्द्र राजभण्डारी, ४ मा माओवादी केन्द्रका भक्तबहादुर तामाङ, ५ मा कांग्रेसका टंकराम राई, ६ मा कांग्रेसका सुनिल राई र ७ मा एमालेका अरूण राई विजयी भएका छन्।
https://www.himalkhabar.com/news/129900
