काठमाडौं । देशभरका स्थानीय तह निर्वाचनको मतपरिणाम आउने क्रम जारी छ । यसैबीच ६ महानगरपालिकामध्ये ५ वटामा सत्तारुढ दलका उम्मेदवारले अग्रता लिइरहेको छ ।
काठमाडौं महानगरपालिकामा भने स्वतन्त्र उम्मेदवार बालेन साहले अग्रता कायम राखेका छन् । अरु ५ वटा महानगरपालिकामा गठबन्धनका उम्मेदवारले अग्रता लिएका छन् । महानगरपालिकामा नेपाली कांग्रेस, नेकपा माओवादी केन्द्र, नेकपा एकीकृत समाजवादी, जनता समाजवादी पार्टी र राष्ट्रिय जनमोर्चाबीच गठबन्धन बनेको हो ।
गठबन्धनका उम्मेदवारले भरतपुर, पोखरा, ललितपुर, विराटनगर र वीरगंज महानगरपालिकामा अग्रता लिइरहेका छन् । नेकपा एमालेका उम्मेदवार भने ६ वटै महानगरपालिकामा दोस्रो स्थानमा छ ।
महानगरको उपप्रमुखको हकमा भने एमालेले काठमाडौं, ललितपुर र विराटनगरमा अग्रता लिइरहेको छ ।
काठमाडौं महानगरको मेयरमा बालेन साहले २०७१ मत ल्याएर अग्रता लिइरहेका छन् भने एमालेका केशव स्थापितले ११६४ मत ल्याउँदै पछ्याइरहेका छन् । नेपाली कांग्रेसकी सिर्जना सिंह १००६ सहित तेस्रो स्थानमा छन् ।
काठमाडौ महानगर
काठमाडौंको उपप्रमुखमा भने एमालेले अग्रता लिइरहेको छ । एमालेकी सुनिता डंगोलले २००० हजार मत ल्याउँदा सत्ता गठबन्धनबाट उम्मेदवार बनेका नेकपा एकीकृत समाजवादीका राजेश्वर श्रेष्ठ ५८० मतसहित दोस्रो स्थानमा छन् । त्यस्तै राप्रपाकी बिनिता मगैयाले ५१३ मत पाएकी छन् ।
ललितपुर महानगर
ललितपुर महानगरमा सत्ता गठबन्धनका तर्फबाट नेपाली कांग्रेसका चिरिबाबु मर्हजनले ८७७ मतसहित अग्रता लिइरहेका छन् । नेकपा एमालेका हरिकृष्ण व्यञ्जनकारले ४०२ मतसहित दोस्रो स्थानमा छन् ।
महानगरको उपप्रमुखमा भने नेकपा एमालेकी मञ्जली शाक्यले ४४४ मत ल्याएर अग्रता लिइरहेकी छन् । गठबन्धनबाटै उम्मेदवार बनेका नेकपा माओवादी केन्द्रका बाबुराजा बज्राचार्य भने २६७ सहित दोस्रो स्थानमा छन् ।
भरतपुर महानगर
भरतपुरमा पनि सत्ता गठबन्धनबाट नेकपा माओवादी केन्द्रकी रेनु दाहालले ११७८ मत ल्याउँदै अग्रता लिइरहेकी छन् । नेकपा एमालेका बिजय सुवेदीले १०६८ मतसहित दाहाललाई पछ्याइरहेका छन् । उपप्रमुखमा पनि गठबन्धनबाट कांग्रेसका चित्रसेन अधिकारीले १२२६ मतसहित अग्रता लिइरहेका छन् । एमाले–राप्रपा गठबन्धनबाट राप्रपाकी हिमला गुरुङले ८३० सहित अधिकारीलाई पछ्याइरहेकी छन् ।
पोखरा महानगर
त्यस्तै पोखरा महानगरमा पनि सत्ता गठबन्धनबाट एकीकृत समाजवादीका धनराज आचार्यले अग्रता लिएका छन् । उनको मत ९२३ छ। एमालेका कृष्णबहादुर थापा ८०६ मतसहित दोस्रो स्थानमा छन् । उपप्रमुखमा पनि सत्ता गठबन्धनबाट नेपाली कांग्रेसकी कोपिला रानाभाटले अग्रता लिइरहेकी छिन् । उनको मत १०२८ छ। एमालेकी एमाले मञ्जुदेवी गुरुङले ९०४ ल्याएर पछ्याइरहेकी छन् ।
वीरगञ्ज महानगर
वीरगञ्ज महानगरमा प्रमुख र उपप्रमुख दुबैमा गठबन्धनको अग्रता छ । गठबन्धनबाट जनता समाजवादीका राजेशमान सिंहले १५०७ मत ल्याएर अग्रता लिइरहेका छन् । नेकपा एमालेका बिजयकुमार सरावगी ६६८ मतसहित सिंहलाई पछ्याइरहेका छन् । उप्रमुखमा नेपाली कांग्रेसका इम्तियाज आलमले ११०५ मत ल्याएर अग्रता लिइरहेका छन् । उनलाई लोसपाका पुरुषोत्तमलाल झाले १६० मतसहित पछ्याइरहेका छन् ।
विराटनगर महानगर
त्यस्तै विराटनगरमा पनि सत्ता गठबन्धनबाट नेपाली कांग्रेसले अग्रता लिइरहेको छ । नेपाली कांग्रेसका नागेश कोइरालाले २५८३ मतसहित अग्रता लिइरहेका छन् । त्यस्तै नेकपा एमालेका सागरकुमार थापाले १९९० मत ल्याएर कोइरालालाई पछ्याइरहेका छन् ।
उपप्रमुखमा भने नेकपा एमालेकी शिल्पा कार्कीले १२१२ मत ल्याउँदै अग्रता लिइरहेकी छन् । सत्ता गठबन्धनबाट जनता समाजवादीका अमरेन्द्र यादवले ८८७ मतसहित कार्कीलाई पछ्याइरहेका छन् ।
