काठमाडौं । शुक्रबार स्थानीय तह निर्वाचनको मतदान हुँदैछ । मुलुक संघीयतामा गइसकेपछि स्थानीय तहको यो दोस्रो निर्वाचन हो ।
यतिबेला मौनअवधि चलिरहेको छ । निर्वाचन आयोगले दलहरुले मतदातालाई प्रभावित नबनाओस् भनेर निर्वाचन सुरक्षाका लागि मतदान सुरु हुनुअघिदेखि ७३ घण्टाका लागि आचारसंहिता लगाउने गर्छ । मौनअवधिको मध्यतिर आउँदा देशका अधिकांश स्थानमा शान्त रहेतापनि केही स्थानमा भने हत्या र झडपका घटनाहरु भएका छन् ।
रुकुमपूर्वको पुथाउत्तरगंगा गाउँपालिकामा ३९ वर्षीया डुसी बुढा भनेर चिनिने जुनमाया डोटी बुढाको अपहरणपछि हत्या भएको छ । घटनामा संलग्न रहेको आरोपमा रुकुमपूर्वका प्रहरीले स्थानीय तीन जना नेतालाई पक्राउ गरेर अनुसन्धान गरिरहेको छ ।
यसैबीच निर्वाचन आयोगले देशमा यो पटकको निर्वाचन शान्तिपूर्ण तरिकाबाट भइरहेको जनाएको छ । शुक्रबार (भोलि) हुने मतदानको लागि सम्पूर्ण तयारी पूरा भएको आयोगले जनाएको छ । निर्वाचन आयोगका प्रवक्ता शालिकराम पौडेलले यस पटकको स्थानीय तह निर्वाचन बहिष्कार गर्ने कोही नभएको बताएका छन् ।
‘हामीलाई प्राप्त जानकारीअनुसार यो पटकको निर्वाचनमा अहिलेसम्म बहिष्कार गर्ने कोही पनि छैन’, उनले भने, ‘एकदम राम्रो छ । राजनीतिक रुपमा अहिले कुनैपनि जोखिम छैन ।’
