काठमाण्डौं, ४ जेठ । नेपालका सबैभन्दा बयोबृद्ध क्रियाशील पाष्टर रोबर्ट कार्थकको ९५ वर्षको उमेरमा जेठ ४ गते विहान ३ः१५ बजे काठमाण्डौंमा निधन भएको छ। नेपाली इसाई मण्डली (नेइम चर्च) ज्ञानेश्वर काठमाण्डौंका वरिष्ठ पास्टर रोबर्ट कार्थक केहि दिन अघिबाट अस्वस्थभई अस्पताल भर्ना भएका थिए । उनको निधन भएको खबर पुष्टि गर्दै प्रार्थनामा सहयोग गर्ने सबैप्रति नेपाली इसाई मण्डली ” ज्ञानेश्वर कार्यकारीणि समितिले आभार व्यक्त गरेको छ ।
नेपाली ख्रीष्टियान समुदायका सबै जनाले पास्टर रोवर्ट कार्थकलाई आदर गर्दै आएका थिए । सन् १९२६ जनवरी १० का दिन भारतको कालिङपोङमा ख्रीष्टियान परिवारमा जन्मेका रोबर्टले सन् १९४६ मा येशूलाई प्रभु र मुक्तिदाताको रूपमा स्वीकार गरेका थिए । सन् १९५६ मा येशू ख्रीष्टको प्रचार गर्दै नेपाल आएका उनले पास्टर डेभिड मुखियाबाट पानीको बप्तिस्मा लिएका थिए ।
पाष्टर रोबर्ट कार्थकले सन् १९५७ मा डिल्लीबजार काठमाण्डौंमा सङ्गतिको सुरु गरेका थिए । त्यहि संगतिलाई पछि ज्ञानेश्वर चर्च र हाल नेपाली इसाई मण्डली (नेइम चर्च) भनेर चिनिन्छ । पाष्टर रोवर्ट कार्थकले सन् १९६० मा मेरी लेप्चासित विवाह गरेका थिए । उनका दुई जना छोरामध्ये पाष्टर शामुएल कार्थक सोही चर्चमा सेवाकाई गर्दै आएका छन् । पाष्टर रोबर्ट कार्थक नेपालकै एक सर्वाधिक ठुलो मण्डली स्थापना गर्न सफल भएका छन् ।
अनेकौं अवसरलाई त्यागेर ख्रीष्टियन जीवन जिउन प्रेरणा दिने उनी समग्र नेपालभरका मण्डलीहरुमा परिचित थिए । उनको सेवकाइलाई नेपालमा सफल सेवकाइको रुपमा मानिन्छ । उनले गत मे १ तारिखका दिन समेत ‘विस्वासीहरूको अन्तरबिन्तिको लागि पवित्रआत्माको सहायता’ भन्ने विषयमा अनलाईन सेवाबाट बचन बाडेका थिए । पाष्टर कार्थक नेपाली इसाईहरुका लागि प्रेरणाको श्रोत मानिन्छन् ।
