खेमराज पुरी ,खोटाङ।
खोटाङको ऐसेलुखर्क गाउँपालिकाले चालुतर्फ ३७.७५ प्रतिशत बजेट खर्च गरेको छ । बुधबार सम्पन्न पाँचौं हिँउदे गाउँसभामा चालुतर्फ आर्थिक वर्ष २०७८/०७९ मा २९ करोड २७ लाख ९५ हजार ९०० रुपैयाँ विनियोजन गरिएकामा ११ करोड ५ लाख ३१ हजार ५८५ खर्च भएको जानकारी दिइएको छ ।
गाउँपालिका उपाध्यक्ष पुष्पकला भुजेलले प्रस्तुत गरेको आर्थिक प्रतिबेदनमा पुँजीगततर्फ २१.८१ प्रतिशत खर्च भएको देखाइएको छ । चालु आर्थिक वर्ष पुँजीगततर्फ १६ करोड ७८ लाख १७ हजार विनियोजन गरिएकामा ३ करोड ६६ लाख ५ हजार २६८ खर्च भएको गाउँपालिकाले जनाएको छ ।चालुतर्फ १८ करोड २२ लाख ६४ हजार ३१५ र पुँजीगततर्फ १३ करोड १२ लाख ११ हजार ७३२ गरी ३१ करोड ८४ लाख ७६ हजार ४७ रुपैयाँ बजेट खर्च हुन बाँकी रहेको आर्थिक प्रतिबेदनमा उल्लेख छ ।
आर्थिक वर्ष २०७८/०७९ मा गाउँपालिकाले कुल ४६ करोड ५६ लाख १२ हजार ९०० बजेट ल्याएकोमा हालसम्म १४ करोड ७१ लाख ३६ हजार ८५३ खर्च भएको छ । वित्तिय व्यवस्थापनमा विनियोजन गरिएको ५० लाख भने हालसम्म गाउँपालिकाले खर्च गर्न सकेको छैन । हिउँदे गाउँसभामा गाउँपालिकाले हालसम्म गरेको निर्णय तथा प्रगती विवरण प्रस्तुत गरेको छ ।
यस्तै, विभिन्न वडागत बजेटको शिर्षक परिवर्तन लगायतका निर्णय गरिएको छ । गाउँसभाले बादेल–विस्काम सडकको लागि ९ लाख रुपैयाँ वियोजन गरेको छ । यस्तै ज्यामिरेस्थित नेपाने सडकका लागि ३ लाख विनियोजन गरिएको छ ।गाउँसभा सदस्य दुर्गा श्रेष्ठले गत ७ साउनमा बसेको गाउँकार्यपालिकाको बैठकले कर्मचारीको प्रोत्साहनभत्ता सम्वन्धी गरेको निर्णय गाउँसभामा प्रस्तुत नगरिएको भन्दै आपत्ती जनाएका थिए ।
गाउँ कार्यपालिकाले १ साउनदेखि लागू हुनेगरी सुरु तलवको स्केल हुन आउने दरले प्रमुख प्रशासकीय अधिकृत र लेखापालको शतप्रतिशत, योजना शाखा प्रमुख, रोजगार संयोजक र कार्यालय सहयोगीको ५० प्रतिशतले प्रोत्साहन भत्ता वृद्धि गर्ने निर्णय गरेको थियो ।गाउँसभा गाउँपालिका अध्यक्ष बिश्वनाथ निरौलाको अध्यक्षतामा सम्पन्न भएको हो । कार्यक्रममा प्रमुख प्रशासकीय अधिकृत हिराकुमारी यादव, गाउँसभा सदस्य, सुरक्षाकर्मी, पत्रकार लगायतको उपस्थिति रहेको थियो ।
