प्रेस नेपाल कम्युनिष्ट पार्टी माओवादी केन्द्र निकट प्रेस सेन्टर नेपालको अध्यक्षमा विष्णु सापकोटा (जुगल) निर्वाचित भएका छन् ।शनिवार र आइतबार चितवनमा भएको राष्ट्रिय महाधिवेशनले १८४ जना केन्द्रीय सदस्यको नाम चयन गरेको हो ।
प्रेस सेन्टर नेपालका केन्द्रीय कार्यालय सदस्य बलराम थापाका अनुसार उक्त १८४ जनाले अध्यक्षसहितका पदाधिकारी चयन गर्ने बताए । महाधिवेशनले १९ बुँदे घोषणापत्र सार्वजनिक गरिसकेको छ ।
अध्यक्षसहितका पदाधिकारी चयन गर्न चितवनमै १८४ जना केन्द्रीय सदस्यको बैठक बस्ने तयारी भइरहेका छ । यसबीच नेतृत्वको लागि भने सहमति जुटेको छ ।केन्द्रीय कमिटीको पहिलो बैठक बस्ने तयारीका बीच अध्यक्षका दाबेदारमध्यकै एक गोविन्द रोका (सचिन)को प्रस्तावमा सापकोटा अध्यक्षमा निर्वाचित भएका हुन् ।
अध्यक्ष निर्वाचित भए पनि उपाध्यक्ष लगायतका पदाधिकारीका विषयमा भने सहमति जुट्न बाँकी छ । महाधिवेशनले ८ मनोनितसहित १९९ सदस्यीय केन्द्रीय सदस्य चयन गर्नुपर्ने थियो । तर, १८४ केन्द्रीय सदस्यको नाम मात्रै घोषणा भएको छ ।
