काठमाडौं। नेकपा (एकीकृत समाजवादी) का लुम्बिनी प्रदेश अध्यक्ष मेटमणि चौधरीले नेकपा एमाले केपी ओलीको प्राइभेट पार्टी मात्र भएको आरोप लगाएका छन् । उनले एमाले बिस्तारै सतीदेवीको लासजस्तै बन्ने ठोकुवा गरे ।
आज नेपाली रेडियो नेटवर्क (एनआरएन) को कार्यक्रम नेपाली बहसका लागि पत्रकार ऋषि धमलासँग कुरा गर्दै नेता चौधरीले भने, “नेकपा एमाले केपी ओलीको प्राइभेट पार्टी हो । यो सुकेको माछाजस्तै हो । भोलि सतीदेवीको लास जस्तै बन्ने हो । समाजवादी पार्टीको आकर्षण दिनदिनै बढ्दै छ, ओलीको पार्टी सुक्ने पोजिसनमा अघि बढ्दै छ । एमालेको प्रभाव तपाईंले कहाँ देख्नुभएको छ ?”
एमालेको महाधिवेशनमा नबोलाइए पनि कुनै गुनासो नरहने उनले बताए । उनले भने, “कसैले भोजभतेर गर्छ भने बोलाउने, नबोलाउने उसको कुरा हो । यसमा हाम्रो केही गुनासो छैन ।”
हिजोआज तपाईंको नाम कतै सुनिँदैन, किन गुप्तबास बस्नुभयो भन्ने पत्रकार धमलाको प्रश्नमा उनले थपे, “म एकीकृत समाजवादीको लुम्बिनी प्रदेश अध्यक्ष छु । पार्टीको काममा व्यस्त छु । ठूलो पार्टी सधैं ठूलो पार्टी रहिरहन्छ भन्नु भ्रम छ । आगामी निर्वाचनमा एकीकृत समाजवादी सबैभन्दा ठूलो पार्टी हुन्छ ।”
नेता चौधरीले पाँच दलीय गठबन्धनले प्रधानन्यायाधीश चोलेन्द्रशमशेर राणाविरुद्ध महाभियोग नल्याउने स्पष्ट पारे । उनले भने, “हामी सकभर न्यायालयभित्रको समस्या आफैं समाधान होस् भन्ने चाहन्छौं । हामीले त्यसमा बोल्दा हस्तक्षेप भनिएला । तर न्यायालयको विवादलाई लामो समयसम्म रहन दिनु पनि उचित होइन । राजनीतिक दलहरु अघि बढेपछि सहज अवतरण हुन्छ ।”
सत्ता गठबन्धनभित्र एमसीसीबारे साझा धारणा बनाएर जानुपर्ने चौधरीको भनाइ छ । उनले थपे, “एमसीसीका उपाध्यक्षहरु, सहायकमन्त्री आएर दबाब बढाएका छन् । सिद्धान्ततः अनुदान लिनु बेठीक होइन । तर केही सर्त करेक्सन गर्नुपर्छ । जनतालाई कन्भिन्स नबनाई जबर्जस्ती गर्ने कुरा आउँदैन ।”
सरकारले पूर्णता पाएको एक महिना मात्र भएको र अब चाडपर्व सकिएकाले कामकारबाही प्रभावकारी रुपमा अघि बढ्ने दाबी उनले गरे । File photo
