खोटाङ, नेपाली कांग्रेस खोटाङका युवा नेता भूपेन्द्र राईले जिल्ला अधिवेशनमा सभापतिमा उम्मेद्वारी दिने घोषणा गरेका छन्।
कांग्रेसको १४ महाधिवेशन तथा सातौ जिल्ला अधिवेशनको मिति नजिकिदै गर्दा कांग्रेसका महासमिति सदस्य तथा हालको दिप्रुङ चुईचुम्मा गाउँपालिका अध्यक्ष समेत रहेका राईले शुक्रबार खोटाङबजारवाट जिल्ला सभापतिमा उठ्ने घोषणा गरेका हुन्।
राईले आफ्नो समूह तयार पारेर उम्मेद्वारी घोषणा गरेपछि जिल्ला अधिवेशनको सरगर्मी झन बढेको छ। राईलाई खोटाङ कांग्रेसमा गोल्ड मेडलिष्ट पनि भन्ने गरिन्छ।
राईको समूहको उपसभापतिमा चन्द्र बहादुर थापा छन्। अर्को जना उपसभापति क्षेत्र नं. १ वाट राखिने श्रोत बताउँछ। सचिवमा पनि छलफल भईरहेको र सहमतिमा योग्य व्यक्ति छानिने जनाईएको छ। सह–सचिवमा ध्यान बहादुर राई छन्। यस्तै, राईको टिमवाट प्रदेश क्षेत्र ‘ख’ सभापतिमा चण्डी कुमार राईले उम्मेद्वारी घोषणा गरेका छन्।प्रदेश क्षेत्र ‘क’ सभापतिमा छलफल गरेर टुग्याईने छ।
यसअघि, महासमिति सदस्य तथा पूर्व पार्टी सभापति विष्णुकुमार राईले पनि आफू सभापतिमा उम्मेद्वारी दिने गरी सेट तयार गरिसकेका छन्। विष्णु कुमारको टिमवाट प्रदेश क्षेत्र ‘क’ सभापतिमा राजेन्द्र राई र प्रदेश क्षेत्र ‘ख’ सभापतिमा दिनेश कुमार घिमिरे छन्। samayojankhabar.com
