काठमाडौं । मेगा बैंक नेपाल लिमिटेडको ‘मेगा लोकप्रिय बचत खाता’मा ग्राहकहरूले आकर्षक विशेषताहरू समावेश गरिएको एनसेलको सिमकार्ड निःशुल्क रूपमा प्राप्त गर्ने भएका छन् । ‘शून्य मोज्दात’मा नै खोल्न सकिने यस ‘मेगा लोकप्रिय बचत खाता’मा ग्राहकहरूले एनसेलद्वारा मेगा बैंकका लागि कस्टमाइज्ड गरिएको सुविधाहरूसहितको सिमकार्ड निःशुल्क रूपमा प्राप्त गर्न सक्नेछन् ।
बचत खाता खोली बचतको फाइदासँगै थप आकर्षक सुविधाहरू दिन तथा साथीभाइ र आफन्तसँगको सम्बन्ध थप प्रगाढ बनोस् भन्ने उद्देश्यले मेगा बैंकले ग्राहकहरूलाई यो अफर ल्याएको हो । मेगा बैंक र एनसेलको यो सहकार्यका लागि बैंककी प्रमुख कार्यकारी अधिकृत अनुपमा खुञ्जेली र एनसेलका प्रमुख कार्यकारी अधिकृत एन्डी चोङबीच सम्झौतापत्रमा हस्ताक्षर भएको हो ।
प्रिलोडेड रूपमा रहेको ५०० एमबी डाटा (इन्टरनेट), ५० मिनेट टकटाइम तथा ५० एसएमएस प्याकेज भएको एनसेलको सिमकार्ड नयाँ खाता खोल्ने ग्राहकहरूका साथसाथै यो निक्षेप योजनाअन्तर्गत मेगा स्मार्ट मोबाइल बैंकिङ सुविधा उपभोग गर्नेे ग्राहकहरूलाई निःशुल्क उपलब्ध गराइने मेगा बैंकले जनाएको छ । साथै, यसरी पाइने सिमकार्डबाट बैंकको मेगा स्मार्ट मोबाइल बैंकिङ र मेगा अनलाइन बैकिङको प्रयोग गर्न अनलिमिटेड इन्टरनेट सुविधा निःशुल्क उपलब्ध हुनेछ ।
यस ‘मेगा लोकप्रिय बचत खाता’ खोल्नासाथ ग्राहकहरूले प्राप्त गर्ने उक्त सिमकार्डमा मासिक एक सय रुपैयाँ मात्र रिचार्ज गर्नासाथ सम्पूर्ण प्याकेजसहितको सेवाको निरन्तरता हुनेछ । यो सेवाको उपभोगसँगै आम ग्राहकवर्गहरूले कम लागतमा सञ्चार प्रविधिमा पँहुच, बचतमा प्रोत्साहन एवं डिजिटल प्रविधिमा आधारित बैंकिङ सेवाको विस्तारमा समेत योगदान रहने मेगा बैंकको विश्वास रहेको छ ।
