नेकपा माओवादी केन्द्रका अध्यक्ष एवम् पूर्वप्रधानमन्त्री पुष्पकमल दाहाल ‘प्रचण्ड’को सचिवालयबाट संचालित अनलाईनको प्रयोग गरी सुनियोजित ढंगले कपोलकल्पित विषयवस्तु जोडेर प्रभु साहको बारे भ्रामक प्रचारबाजी भएको नेता बिजय यादवले आरोप लगाएका छन् ।
प्रभु साहले क्यानडा पुर्याइदिने भनेर पैसा लिएको भनी गलत आरोप लगाउन एक महिलालाई पैसा दिएर प्रचण्डले सुनियोजित नाटक मञ्चन गर्न लगाएको नेता यादवले बताए ।
“प्रभु साह देश र जनताको लागि लड्ने नेता हो । उहाँ जहिले पनि विधिको शासनलाई स्थापित गर्न संघर्षशील हुनुहुन्छ । अहिले देशलाई अस्थिरताको भुमरीबाट मुक्त गराउने अभियानमा हुनुहुन्छ । त्यसबाट यथास्थितिवादी प्रतिक्रियावादीहरु त्रसित भएका छन् । देशलाई अस्थिर बनाउने मध्येको एक प्रतिक्रियावादी प्रचण्ड पनि हो । र प्रचण्डको पार्टी समेत अवैद्य छ भने कुरा प्रभु साहबाट नै बाहिर आएको हो ।” नेता यादवले भने, “आफ्नो पार्टी खारेज हुने, सत्ताको भोग गर्न नपाउने भएपछि प्रचण्डले कसरी हुन्छ प्रभु साहलाई तह लगाउनुपर्छ भन्ने धेयले निरन्तर षडयन्त्र गर्दैं आएका छन् । पछिल्लो समय अपराधिक समूहको एक महिलालाई पैसा खुवाएर उहाँमाथि गलत आरोप लगाउन जुन षडयन्त्र गरेको छ त्यो सबैले बुझेका छन् ।”
“तर दुखद कुरा के हो भने देशलाई सहि दिशा र जानकारी दिने मिडिया समेत प्रचण्डको पापको भागिदार बनेको छ । प्रचण्डको सचिवालयबाट सञ्चालित केही मिडियाहरु समेत यसमा सामेल भएका छन् । तर प्रचण्डका कुनै पनि षडयन्त्र सफल हुदै जनता सचेत छन् ।” नेता यादवले थपे । फाइल फोटो
