नुवाकोट । रसुवाको भोटेकोशी नदीमा आएको बाढीबाट क्षतिग्रस्त नुवाकोटको बेलकोटगढीस्थित पिमलटार–जागाराम झोलुङ्गे पुलको पुनर्निर्माण कार्य सम्पन्न भएको छ। पुल मर्मतपछि स्थानीयवासीका लागि आवतजावत पूर्णरूपमा सञ्चालनमा आएको छ।
बाढीका कारण पुलका लठ्ठा बटारिनुका साथै अन्य संरचनामा समेत क्षति पुगेको थियो। पुनर्निर्माणका क्रममा बटारिएका लठ्ठा सोझ्याउने, ह्यान्ड रेल केबल फेर्ने तथा आवश्यक संरचनाको मर्मत गरिएको हो।
त्यसैगरी, पुलमा नयाँ स्टिल डेक र बिम जडान गरी आज जाली राख्ने कामसमेत पूरा गरिएको छ। आवश्यक मर्मत तथा पुनर्निर्माण सम्पन्न भएपछि पुललाई सुरक्षित रूपमा सञ्चालनमा ल्याइएको हो।
पूर्वाधार विकास मन्त्रालयअन्तर्गतको स्थानीय पूर्वाधार विकास विभागले बाढी प्रभावित क्षेत्रमा क्षतिग्रस्त झोलुङ्गे पुलहरूको पुनर्निर्माण तथा मर्मत कार्यलाई तीव्रता दिएको जनाएको छ। स्थानीय आवतजावत सहज बनाउन क्षतिग्रस्त संरचनाको मर्मतलाई प्राथमिकतामा राखिएको छ।
सरकारको तीव्र पहलकदमीका कारण धादिङ, नुवाकोट र गोरखामा रहेका अन्य १२ वटा झोलुङ्गे पुलको मर्मत कार्यसमेत अन्तिम चरणमा पुगेको छ। ती पुलको मर्मत सम्पन्न भएपछि बाढी प्रभावित क्षेत्रमा आवतजावत थप सहज हुने अपेक्षा गरिएको छ।
