भक्तपुर। मध्यपुर थिमि नगरपालिकाका प्रमुख प्रशासकीय अधिकृत भोजराज घिमिरेलाई अख्तियार दुरुपयोग अनुसन्धान आयोगको टोलीले नियन्त्रणमा लिएको छ। नगरपालिकाबाट बाहिरिएको एक विद्युतीय गाडीमा स्रोत नखुलेको ३३ लाख रुपैयाँ फेला परेपछि आयोगले घिमिरेसहित अन्य व्यक्तिमाथि अनुसन्धान अघि बढाएको हो।
प्राप्त विवरणअनुसार सोमबार अपराह्न नगरपालिकाबाट निस्किएको बागमती प्रदेश ०१–०३५ च २६८७ नम्बरको टाटा विद्युतीय कारलाई अख्तियारको टोलीले मध्यपुर थिमि नगरपालिका–स्थित निकोसेराको अजिमा पेट्रोल पम्प नजिक रोकेर जाँच गरेको थियो। जाँचका क्रममा गाडीभित्र ठूलो परिमाणमा नगद फेला परेपछि आयोगको टोलीले कारमा सवार व्यक्तिहरूलाई नियन्त्रणमा लिएको बताइएको छ।
उक्त गाडीमा चालकका अतिरिक्त घिमिरेका भाइ नाता पर्ने भनिएका भुवन ढुङ्गेल र उनकी श्रीमतीसमेत सवार रहेको खुलेको छ। उनीहरूलाई नियन्त्रणमा लिएर सोधपुछ तथा अनुसन्धान प्रक्रिया अघि बढाइएको छ।
नगद बरामद भएको घटनापछि अख्तियारको टोली नगरपालिकाको कार्यालय पुगेको थियो। टोलीले प्रमुख प्रशासकीय अधिकृत घिमिरेलाई कार्यालयबाटै नियन्त्रणमा लिएर थप अनुसन्धानका लागि घटनास्थलमा ल्याएको जनाइएको छ।
अख्तियारको प्रारम्भिक दाबीअनुसार बरामद भएको ३३ लाख रुपैयाँ घुसबापत प्राप्त रकम भएको र उक्त रकम व्यवस्थापनका लागि ढुङ्गेललाई जिम्मा लगाइएको आशंका गरिएको छ। यद्यपि, प्रमुख प्रशासकीय अधिकृत घिमिरेले आफूले घुस लिएको भन्ने आरोप अस्वीकार गरेका छन्।
घटनापछि अख्तियारको टोलीले बरामद रकमको मुचुल्का तयार पार्ने तथा घटनासँग सम्बन्धित प्रमाण संकलन गर्ने काम गरिरहेको छ। बरामद रकमको स्रोत, यसको प्रयोजन र घटनामा संलग्न व्यक्तिहरूको भूमिकाबारे थप अनुसन्धान भइरहेको छ। यस विषयमा आयोगको आधिकारिक विस्तृत विवरण आउन बाँकी रहेको छ।
