काठमाडौं । रिवन इन्टरटेनमेन्ट प्रालिको आयोजनामा सम्पन्न ‘ह्वीसपर मिसेस नेपाल वर्ल्ड २०२६’ को मुख्य उपाधि विनिता गुरुङले जितेकी छन्। शनिबार राति काठमाडौंको प्रदर्शनीमार्गस्थित नेपाल पुलिस क्लबमा आयोजित फाइनल प्रतिस्पर्धामा २१ प्रतिस्पर्धीलाई पछि पार्दै गुरुङले उपाधि आफ्नो नाममा पार्न सफल भएकी हुन्।
मुख्य उपाधिसँगै उनले स्कुटर पुरस्कार प्राप्त गरेकी छन्। खोटाङकी गुरुङ नेपाल राष्ट्र बैंककी उपनिर्देशक तथा अधिवक्तासमेत हुन्। उपाधि जितेसँगै उनले अमेरिकामा आयोजना हुने विवाहित महिलाहरूको अन्तर्राष्ट्रिय सौन्दर्य प्रतियोगिता ‘मिसेस वर्ल्ड’मा नेपालको प्रतिनिधित्व गर्ने अवसर पाउनेछिन्। उनले ‘तपाईंको बजार बेस्ट पर्सनालिटी’ उपउपाधिसमेत हात पारिन्।
प्रतियोगितामा नेहा गुप्ता फस्ट रनर्सअप घोषित भइन्। उनले ‘रिबन इन्टरटेनमेन्ट म्यानेजमेन्ट च्वाइस’ उपाधिसमेत प्राप्त गरिन्। ज्योति लामिछाने सेकेन्ड रनर्सअप र सगुन खनाल थर्ड रनर्सअप घोषित भए। खनालले ‘हर्लिक्स बेस्ट फिजिक’ उपाधिसमेत जितिन्। त्यस्तै, शिल्पा न्यौपाने महर्जन ‘मिसेस नेपाल इन्टरनेसनल २०२६’, क्रिस्टिना ज्ञवाली ‘मिसेस कोस्मो २०२६’ र ऋचा शर्मा ‘एमएस इन्टरनेसनल २०२६’ का विजेता घोषित भए। यी तीनै विधाका विजेताले जनही ५० हजार रुपैयाँ पुरस्कार प्राप्त गरेका छन्। आयोजक संस्थाका प्रमुख कार्यकारी अधिकृत निशुकान्त झाका अनुसार मिसेस नेपाल इन्टरनेसनल र एमएस इन्टरनेसनलका विजेताले सिंगापुर तथा मिसेस कोस्मोकी विजेताले म्यानमारमा आयोजना हुने अन्तर्राष्ट्रिय प्रतियोगितामा सहभागी हुने अवसर पाउनेछन्।
यसैबीच, नेपाली चलचित्र क्षेत्रकी लोकप्रिय अभिनेत्री निरुता सिंहलाई ‘मानार्थ मिसेस नेपाल वर्ल्ड २०२६’ को उपाधिबाट सम्मानित गरिएको छ। नेपाली चलचित्र क्षेत्रमा साढे तीन दशकभन्दा लामो समयदेखि योगदान पुर्याउँदै आएकी सिंहलाई उनको कलायात्राको सम्मानस्वरूप उक्त उपाधि प्रदान गरिएको आयोजकले जनाएको छ।
प्रतियोगितामा विभिन्न विधाका उपाधिसमेत प्रदान गरिएको थियो। सन्ध्या लामा ‘अर्ना मोस्ट इनर्जेटिक’, सुष्मा थापा ‘निभिया फ्याबुलस फेस’ र ‘केडी फोटोग्राफी मोस्ट फोटोजेनिक’, अञ्जु परियार ‘मोस्ट ट्यालेन्टेड’, शिल्पा न्यौपाने महर्जन ‘क्युटी केयर एन्ड ब्युटी हब बेस्ट हेयर’, दीप्ति ढुंगेल ‘हेल्दी स्किन’, क्रिस्टिना ज्ञवाली ‘बेस्ट र्याम्प वाक’ तथा ऋचा शर्मा ‘दिनाज फेसन हाउस मोस्ट पङ्चुअल’ घोषित भए।
त्यस्तै, समीक्षा रानाभाट ‘आयुथ वेदा बेस्ट स्माइल’, श्वेच्छा पौड्याल ‘रिलायबल डाइग्नोस्टिक ल्याबोरेटरी मोस्ट डिसिप्लिन्ड’, कञ्चन महर्जन ‘सेन्ट्रल फेसन एकेडेमी फेसन आइकन’, बिन्दु थापा राणा ‘मोस्ट कन्फिडेन्ट’, यास्मिन बेगम सैयद ‘मिसेस कन्जेनियालिटी’ र सुनिता श्रेष्ठ कर्माचार्य ‘मिसेस ह्युम्यानिटेरियन’ घोषित भए। प्रतियोगिताले विवाहित महिलाको व्यक्तित्व, आत्मविश्वास, प्रतिभा र नेतृत्व क्षमतालाई उजागर गर्ने उद्देश्य राखेको आयोजकले जनाएको छ।
