काठमाडौं । सरकारी छाप, दस्तखत तथा कागजात किर्ते गरी नक्कली कागजात तयार गर्ने गरेको आरोपमा काठमाडौं प्रहरीले तीन जनालाई पक्राउ गरेको छ । जिल्ला प्रहरी परिसर काठमाडौंका अनुसार काठमाडौं महानगरपालिका–२९, पुतलीसडकस्थित पुष्पराज पहारीले सञ्चालन गरेको प्यासन फाउण्डेशन कन्सल्टेन्सीमा सरकारी छाप दस्तखत किर्ते गरी कागजात तयार पार्ने गरेको सूचनाका आधारमा प्रहरीले छापा मारेको हो ।
प्रहरी वृत्त सिंहदरबारबाट खटिएको प्रहरी टोलीले कन्सल्टेन्सीमा चेकजाँच गर्दा विभिन्न नगरपालिका, गाउँपालिका, सहकारी संस्था तथा विद्यालयका कागजात, लेटरप्याड, छाप, ल्यापटपलगायतका सामग्री फेला पारेको जनाएको छ । उक्त सामग्री बरामद गरी प्रहरीले तीन जनालाई नियन्त्रणमा लिएको छ ।
पक्राउ पर्नेहरुमा ललितपुरमा बस्दै आएका ३४ वर्षीय सन्दीप कार्की, बुढानीलकण्ठ नगरपालिका–११ का २५ वर्षीय संगीता मगर र गोंगबुमा बस्दै आएकी २० वर्षीया अंकिता नेपाल रहेका छन् ।
उनीहरूलाई लिखतसम्बन्धी कसुरमा नियन्त्रणमा लिई अनुसन्धान भइरहेको प्रहरीले जनाएको छ । जिल्ला अदालत काठमाडौंबाट उनीहरूलाई तीन दिनको म्याद थप गरी अनुसन्धान अघि बढाइएको जनाएको छ ।
प्रहरीले बरामद भएका कागजात तथा विद्युतीय सामग्रीको थप परीक्षण गरी सरकारी छाप तथा दस्तखत किर्ते गर्ने कार्यमा अन्य व्यक्तिको संलग्नता भए- नभएको विषयमा समेत अनुसन्धान गरिरहेको जनाएको छ ।
