काठमाडौं । भक्तपुर निर्वाचन क्षेत्र १ बाटा प्रत्येक्ष निर्वाचित प्रतिनिधिसभा सदस्य माननीय रुकेश रंजितले आज भक्तपुर क्यान्सर अस्पतालको भ्रमण गर्नुभएको छ। भ्रमणका क्रममा उहाँले अस्पतालमा उपचाररत बिरामीहरूको अवस्था तथा उपचार सेवाबारे जानकारी लिनुभएको छ।
भ्रमणका क्रममा सांसद रंजितले अस्पतालका स्वास्थ्यकर्मी तथा सम्बन्धित अधिकारीहरूसँग अस्पतालको वर्तमान अवस्था, सेवा प्रवाह र बिरामीले भोगिरहेका समस्याबारे छलफल गर्नुभयो। उहाँले अस्पतालका आवश्यकताका विषयमा समेत जानकारी लिनुभएको थियो।
छलफलमा अस्पतालको भौतिक पूर्वाधार, उपचार सेवाको विस्तार तथा आगामी दिनमा सञ्चालन गरिने योजनाबारे समेत छलफल भएको थियो। अस्पताललाई थप व्यवस्थित र प्रभावकारी बनाउन आवश्यक सहयोग तथा पहलका विषयमा पनि कुराकानी भएको बताइएको छ।
सांसद रंजितले नागरिकलाई सहज, गुणस्तरीय र प्रभावकारी स्वास्थ्य सेवा उपलब्ध गराउनु राज्यको प्रमुख दायित्व भएको बताउँदै भक्तपुर क्यान्सर अस्पतालको विकासका लागि आवश्यक नीतिगत तथा भौतिक सहयोगका लागि आफू निरन्तर पहल गर्ने प्रतिबद्धता व्यक्त गर्नुभयो।
