काठमाडौं । श्रम संस्कृति पार्टी, ललितपुर जिल्ला कार्यसमितिले गणेश नेपालीमाथि भएको दुर्व्यवहारप्रति गम्भीर ध्यानाकर्षण भएको जनाएको छ। शनिबार जारी गरिएको एक खेद वक्तव्यमार्फत पार्टीले गणेश नेपालीको पक्षमा शान्तिपूर्ण रूपमा उभिँदा माननीय आरेन राईमाथि भएको दुर्व्यवहारप्रति गहिरो दुःख व्यक्त गर्दै घटनाको भर्त्सना गरेको हो।
पार्टीले उक्त घटनालाई लोकतान्त्रिक मूल्य–मान्यता र नागरिकको शान्तिपूर्ण अभिव्यक्ति अधिकारमाथिको आघातका रूपमा व्याख्या गर्दै यस्ता गतिविधि कुनै पनि हालतमा स्वीकार्य नहुने जनाएको छ। साथै घटनामा संलग्न व्यक्तिहरूमाथि निष्पक्ष अनुसन्धान हुनुपर्नेमा जोड दिएको छ।
वक्तव्यमा दोषीमाथि तत्काल निष्पक्ष छानबिन गरी कानुनबमोजिम कारबाही गर्न सम्बन्धित निकायसँग माग गरिएको छ। कानुनी शासनको प्रत्याभूति गर्दै यस्ता घटनाको पुनरावृत्ति हुन नदिन राज्यका निकायले प्रभावकारी भूमिका खेल्नुपर्ने पार्टीको भनाइ छ।
श्रम संस्कृति पार्टी, ललितपुर जिल्ला कार्यसमितिका अध्यक्ष ऋतुवर्तन राईद्वारा हस्ताक्षरित उक्त वक्तव्य २०८३ असार २६ गते जारी गरिएको हो। वक्तव्यको अन्त्यमा पार्टीले “जय माटो, जय देश” भन्ने नारासहित आफ्नो धारणा सार्वजनिक गरेको छ।
