काठमाडौं । श्रम संस्कृति पार्टीका अध्यक्ष तथा सुनसरी–१ बाट प्रतिनिधिसभा सदस्य हर्कराज राई (हर्क साम्पाङ) ले आफ्नो पार्टीले निर्वाचनमा अपेक्षाकृत कम मत प्राप्त गर्नुका पाँच प्रमुख कारण रहेको दाबी गरेका छन्। उनले सामाजिक सञ्जाल फेसबुकमार्फत आफ्नो धारणा सार्वजनिक गर्दै श्रम संस्कृति पार्टीले सिद्धान्तमा सम्झौता नगरेकै कारण जनमत सीमित भएको बताएका हुन्।
साम्पाङले पहिलो कारणका रूपमा आफ्नो पार्टीले कुनै पनि विदेशी शक्तिको प्रभाव वा संरक्षण स्वीकार नगरेको उल्लेख गरेका छन्। उनले “विदेशी प्रभुलाई नढोगेर, नबोकेर” राजनीति गरेको भन्दै त्यसको असर निर्वाचन परिणाममा परेको दाबी गरेका छन्।
दोस्रो कारणमा उनले विदेशी स्रोत तथा व्यापारीबाट आर्थिक सहयोग नलिएको र त्यसैले चुनावमा अन्य दलसरह खर्च गर्न नसकेको बताएका छन्। उनका अनुसार आर्थिक शक्ति नभएका कारण पार्टीले व्यापक चुनावी अभियान सञ्चालन गर्न कठिनाइ भोग्नुपरेको थियो।
त्यसैगरी तेस्रो कारणमा उनले आफ्नो पार्टी हिंसा, हत्या, भ्रष्टाचार वा विनाशकारी गतिविधिबाट टाढा रहेको उल्लेख गरेका छन्। सिंहदरबार जलाउने, कसैको हत्या गर्ने, रगत बगाउने वा भ्रष्टाचार गर्ने राजनीति नगरेकाले पनि मत कम आएको उनको तर्क छ।
चौथो कारणमा साम्पाङले विदेशी ऋणको भरमा होइन, नेपालीको आफ्नै श्रम र पसिनाबाट देश निर्माण गर्नुपर्ने तथा स्वाधीन बन्नुपर्ने आफ्नो राजनीतिक अडानलाई जनताले पर्याप्त समर्थन नगरेको संकेत गरेका छन्। उनले आत्मनिर्भरता र श्रम संस्कृतिलाई पार्टीको मूल विचारका रूपमा पुनः दोहोर्याएका छन्।
यस्तै पाँचौँ कारणका रूपमा उनले एमसीसी (MCC) र एसपीपी (SPP) को खुला विरोध गरेको विषयलाई अघि सारेका छन्। साम्पाङले यी विषयमा आफ्नो पार्टीको स्पष्ट अडानकै कारण श्रम संस्कृति पार्टीले अपेक्षाअनुसार मत प्राप्त गर्न नसकेको दाबी गरेका छन्। उनले सार्वजनिक गरेको यो अभिव्यक्तिले सामाजिक सञ्जालमा समर्थक र आलोचकबीच नयाँ बहस पनि सुरु भएको छ।
