काठमाडौं । कुमारी बैंकले दिगो बैंकिङ अभ्यासलाई संस्थागत गर्दै हरित वित्तीय प्रणालीको प्रवर्द्धन गर्ने उद्देश्यले जर्मन वित्तीय संस्था डच स्पार्कासेनस्टिफ्टुङ फर इन्टरनेसनल को–अपरेसनसँग रणनीतिक परियोजना सम्झौता गरेको छ। जर्मनीको संघीय आर्थिक सहयोग तथा विकास मन्त्रालयको आर्थिक सहयोगमा सञ्चालित क्षेत्रीय कार्यक्रमअन्तर्गत उक्त साझेदारी गरिएको बैंकले जनाएको छ।
यो कार्यक्रम एसियाका चयनित देशहरूमा वित्तीय क्षेत्रको सामाजिक तथा पारिस्थितिकीय रूपान्तरणलाई प्रवर्द्धन गर्ने लक्ष्यसहित सञ्चालन भइरहेको छ। सम्झौतामार्फत कुमारी बैंकले दिगोपन र हरित बैंकिङ अभ्यासलाई आफ्नो संस्थागत प्रणालीमा थप प्रभावकारी रूपमा समावेश गर्ने अपेक्षा गरिएको छ।
सम्झौतापत्रमा कुमारी बैंकका प्रमुख कार्यकारी अधिकृत रामचन्द्र खनाल तथा डच स्पार्कासेनस्टिफ्टुङ फर इन्टरनेसनल को–अपरेसनकी एसिया डिभिजन प्रमुख डा. इलोन्का रुल स्टर्नले हस्ताक्षर गरेका छन्। दुवै पक्षले दिगो बैंकिङको दीर्घकालीन विकासका लागि सहकार्यलाई महत्त्वपूर्ण उपलब्धिका रूपमा लिएका छन्।
सम्झौताअनुसार परियोजना दुई चरणमा कार्यान्वयन गरिनेछ। पहिलो चरणमा दिगो बैंकिङका आधारभूत संरचना र नीति विकासमा जोड दिइनेछ भने दोस्रो चरणमा हरित बैंकिङ अभ्यासलाई थप विस्तार र संस्थागत गर्ने योजना रहेको छ।
यस सहकार्यअन्तर्गत डच स्पार्कासेनस्टिफ्टुङ फर इन्टरनेसनल को–अपरेसनले ‘ईएसजी रिस्क राडार’ र ‘सस्टेनेबल फाइनान्स कम्पास’ लगायत आफ्ना विशेष प्राविधिक उपकरण उपलब्ध गराउँदै आवश्यक प्राविधिक सहयोग प्रदान गर्ने जनाएको छ। यसबाट कुमारी बैंकले वातावरणीय, सामाजिक तथा सुशासन (ESG) सम्बन्धी जोखिम व्यवस्थापन र दिगो वित्तीय सेवा विस्तारमा थप क्षमता विकास गर्ने विश्वास लिइएको छ।
