काठमाडौं । अविरल वर्षापछि बागमती नदीको बहाव बढ्दा काठमाडौं महानगरपालिका र नेपाल सरकारको समन्वयमा सञ्चालन गरिएको कीर्तिपुर नगरपालिका–१० सुन्दरीघाटस्थित राधास्वामी सुकुम्बासी होल्डिङ सेन्टर डुबानमा परेको छ। उपत्यकाका विभिन्न स्थानबाट हटाइएका अव्यवस्थित बसोबासीलाई अस्थायी रूपमा राखिएको उक्त होल्डिङ सेन्टरमा शुक्रबार राति पानी पसेपछि उद्धार कार्य सञ्चालन गरिएको हो।
प्राप्त जानकारीअनुसार राति १:३८ बजे दंगा नियन्त्रण रेजिमेन्टबाट प्रहरी नायब उपरीक्षक (डीएसपी) को कमाण्डमा डिजास्टर म्यानेजमेन्ट (DM) सहित ३० जना सशस्त्र प्रहरी तथा नेपाल प्रहरीका ३० जनाको संयुक्त टोली उद्धारका लागि खटिएको थियो। टोलीले होल्डिङ सेन्टरमा रहेका १५४ जनामध्ये ५४ जनाको सुरक्षित उद्धार गरेको जनाएको छ।
उद्धार गरिएका ५४ जनालाई त्रिभुवन विश्वविद्यालयस्थित स्मृति भवनमा अस्थायी रूपमा स्थानान्तरण गरिएको छ। त्यसैगरी ६ जना नजिकैको होस्टलमा बसेका छन् भने ९४ जनाले अन्यत्र जान अस्वीकार गर्दै पानी नपसेको सुरक्षित स्थानमै बस्ने निर्णय गरेका छन्।
डुबानपछि सम्बन्धित विषयगत क्षेत्र (क्लस्टर) सक्रिय भई प्रभावितहरूका लागि खाना, पिउने पानी तथा अन्य अत्यावश्यक राहत सामग्रीको व्यवस्थापन सुरु गरिएको छ। उद्धार तथा राहत कार्यलाई निरन्तरता दिइएको सुरक्षा निकायले जनाएको छ।
काठमाडौं महानगरपालिका र सम्बन्धित निकायहरूले प्रभावित क्षेत्रको अवस्था निरन्तर अनुगमन गरिरहेका छन्। वर्षा जारी रहेकाले जोखिम कायमै रहेको भन्दै आवश्यक सतर्कता अपनाउन तथा सुरक्षा निकायको निर्देशन पालना गर्न सम्बन्धित निकायले आग्रह गरेका छन्।
