मकवानपुर । बागमती प्रदेश सरकारले प्रदेशभित्र कार्यरत पत्रकारलाई सामाजिक सुरक्षा कोष तथा बिमा कार्यक्रममा आबद्ध गराउने तयारी गरेको छ। पत्रकारहरूको पेसागत सुरक्षा र सामाजिक संरक्षणलाई प्राथमिकता दिँदै सरकारले आगामी आर्थिक वर्ष २०८३/८४ को बजेटमार्फत यस कार्यक्रमका लागि एक करोड रुपैयाँ विनियोजन गरेको हो।
सरकारले स्वतन्त्र प्रेसको सम्मान र पत्रकारको पेशागत सुरक्षालाई सुदृढ बनाउने उद्देश्यले सामाजिक सुरक्षा कोष र बिमा कार्यक्रममा जोड्ने योजना अघि सारेको जनाएको छ।
नेपाल पत्रकार महासङ्घ बागमती प्रदेशका अध्यक्ष कृष्ण सारु मगरका अनुसार बागमती प्रदेशका १३ जिल्लामा दुई हजार पाँच सयभन्दा बढी पत्रकार क्रियाशील छन्। उनले सरकारले विनियोजन गरेको बजेट पत्रकारहरूको सामाजिक तथा आर्थिक सुरक्षाका लागि सकारात्मक कदम भएको उल्लेख गर्दै यसको प्रभावकारी कार्यान्वयनमा जोड दिए।
अध्यक्ष मगरले सञ्चार क्षेत्रको विकास, पत्रकारको क्षमता अभिवृद्धि तथा प्रेस स्वतन्त्रताको प्रवर्द्धनका लागि बजेटमा समावेश अन्य कार्यक्रमहरू पनि प्रभावकारी रूपमा कार्यान्वयन हुनुपर्ने आवश्यकता औँल्याए।
प्रदेश सरकारले पत्रकारलाई सामाजिक सुरक्षा प्रणालीमा आबद्ध गराउने पहललाई सञ्चारकर्मीहरूको दीर्घकालीन हित र पेशागत स्थायित्वसँग जोडिएको महत्वपूर्ण कार्यक्रमका रूपमा हेरिएको छ।
