पर्सा । पर्सा जिल्लामा प्रहरीले लुकाई–छिपाई राखिएको ठूलो परिमाणको गाँजा बरामद गरेको छ। जिल्ला प्रहरी कार्यालय पर्साबाट खटिएको प्रहरी टोलीले विशेष सूचनाका आधारमा जंगल क्षेत्रमा खोजतलास गर्ने क्रममा करिब ३७० किलोग्राम गाँजा फेला पारी बरामद गरेको हो।
प्रहरीका अनुसार गाँजालाई विभिन्न प्याकेटमा पोका पारेर जंगलभित्र लुकाएर राखिएको अवस्थामा भेटिएको थियो। बरामद गाँजा नियन्त्रणमा लिई थप अनुसन्धान अघि बढाइएको प्रहरीले जनाएको छ।
घटनामा संलग्न व्यक्ति वा समूहको पहिचान तथा खोजी कार्य तीव्र पारिएको छ। लागूऔषध ओसारपसार तथा कारोबार नियन्त्रणका लागि प्रहरीको अभियान निरन्तर जारी रहेको र यस्ता गतिविधिमा संलग्न जो–कोहीलाई कानुनी दायरामा ल्याइने प्रहरीको भनाइ छ।
प्रहरीले लागूऔषधविरुद्धको अभियानमा नागरिकको सहयोग आवश्यक रहेको उल्लेख गर्दै शंकास्पद गतिविधिबारे नजिकको प्रहरी कार्यालय वा आपतकालीन नम्बर १०० मा जानकारी गराउन आग्रह गरेको छ।
