काठमाडौँ । वैदेशिक रोजगारीका क्षेत्रमा हुने ठगी नियन्त्रण तथा श्रमिकका समस्या समाधानलाई प्राथमिकता दिँदै वैदेशिक रोजगार विभागले आफ्नो अनुगमन र अनुसन्धान गतिविधिलाई थप तीव्र बनाएको छ। विभागका अनुसार असार ३ गते मात्रै २९ वटा नयाँ उजुरी दर्ता भएका छन्।
विभागको मुद्दा तथा अनुसन्धान शाखाले ठगीमा संलग्न व्यक्तिहरूमाथि कानुनी कारबाहीलाई निरन्तरता दिँदै सोही दिन २८ वटा पक्राउ पुर्जी जारी गरेको जनाएको छ। साथै, ९ जनालाई पक्राउ गरी सम्बन्धित निकायमा उपस्थित गराइएको छ भने ९ वटा मुद्दा आपसी सहमतिमार्फत मिलापत्र गराइएको विभागले जनाएको छ।
त्यसै दिन बैंक, अभियोगपत्र, रायपत्र तथा अन्य प्रशासनिक कामसँग सम्बन्धित ६८ वटा पत्राचार तथा चलानी कार्य सम्पन्न गरिएको विभागको विवरणमा उल्लेख छ।
संस्था अनुगमन शाखाले वैदेशिक रोजगार व्यवसाय सञ्चालन गरिरहेका विभिन्न म्यानपावर कम्पनीलाई पाँच वटा पत्राचार गरेको छ। साथै, सेवाग्राहीलाई १६ वटा राहदानी वितरण गरिएको विभागले जनाएको छ।
यस्तै, राहत, उद्धार तथा समन्वय शाखाले छ जनाको उद्धार गर्नुका साथै दुई जनालाई क्षतिपूर्ति उपलब्ध गराएको छ। उक्त शाखामा १० वटा नयाँ उजुरी दर्ता भएका छन् भने १३ वटा द्विपक्षीय छलफल र १५ वटा परामर्श सेवा प्रदान गरिएको छ।
गुनासो व्यवस्थापनतर्फ ‘हेलो सरकार’ मार्फत प्राप्त ११ वटा गुनासोमध्ये नौ वटाको समाधान गरिएको छ। विभागको कल सेन्टरमा प्राप्त ४७ वटा गुनासोमध्ये २९ वटाको सम्बोधन भइसकेको छ भने बाँकी गुनासोहरू प्रक्रियामै रहेको जनाइएको छ।
विभागले युवा, श्रम तथा रोजगार मन्त्री रामजी यादवको सचिवालय तथा ह्वाट्सएपमार्फत आउने राहत र उद्धारसम्बन्धी गुनासो व्यवस्थापनलाई अझ व्यवस्थित र प्रभावकारी बनाउन नयाँ कार्यविधि अपनाउने सुझाव दिएको छ। आवश्यक कागजात र आधिकारिक पत्रसहित गुनासो पेश गरेमा राहत तथा उद्धार प्रक्रिया छिटो र प्रभावकारी हुने विभागको भनाइ छ।
विभागको पछिल्लो सक्रियताले वैदेशिक रोजगारीमा रहेका तथा विदेश जाने तयारीमा रहेका नेपाली श्रमिकको अधिकार संरक्षण, ठगी नियन्त्रण र सेवा प्रवाहमा सुधार ल्याउने अपेक्षा गरिएको छ।
