काठमाडौं । राष्ट्रिय स्वतन्त्र पार्टी (रास्वपा) को केन्द्रीय सचिवालय बैठक आज बस्दैछ। पार्टीको आगामी राष्ट्रिय महाधिवेशनको तयारीलाई अन्तिम रूप दिन बैठक बोलाइएको हो।
पार्टी केन्द्रीय कार्यालयमा बस्ने बैठकले असार ७ देखि ९ गतेसम्म चितवनमा आयोजना हुने राष्ट्रिय महाधिवेशनका लागि आवश्यक कार्यतालिका पारित गर्ने तयारी गरेको छ। साथै, पार्टीको संशोधित विधानको मस्यौदामाथि छलफल गरी अनुमोदन गर्ने एजेन्डा पनि बैठकमा रहेको जनाइएको छ।
रास्वपाले महाधिवेशनलाई संगठन सुदृढीकरण, नीतिगत स्पष्टता र आगामी राजनीतिक रणनीति तय गर्ने महत्वपूर्ण अवसरका रूपमा लिएको छ। बैठकमा महाधिवेशन व्यवस्थापन, प्रतिनिधि सहभागिता, विभिन्न प्रस्ताव तथा संगठनात्मक विषयमा समेत निर्णय गरिने बताइएको छ।
पार्टीका विभिन्न तहका अधिवेशनहरू सम्पन्न भइसकेपछि अब राष्ट्रिय महाधिवेशनको तयारी तीव्र पारिएको छ। महाधिवेशनबाट पार्टीको भावी कार्यदिशा, नेतृत्व संरचना र संगठन विस्तारसम्बन्धी महत्वपूर्ण निर्णय हुने अपेक्षा गरिएको छ।
रास्वपाले महाधिवेशनलाई व्यवस्थित, सहभागितामूलक र उपलब्धिमूलक बनाउन आवश्यक तयारीलाई अन्तिम चरणमा पुर्याएको जनाएको छ। सचिवालय बैठकबाट महाधिवेशनसँग सम्बन्धित विभिन्न प्रस्तावहरू अनुमोदन गर्दै आवश्यक जिम्मेवारीसमेत बाँडफाँट गरिनेछ।
