दाङ । सामाजिक सञ्जालमा एक युवतीलाई जंगलमा लगेर खुकुरी देखाउँदै डरधम्की दिने, कुटपिट गर्ने तथा आपत्तिजनक व्यवहार गरेको भिडियो सार्वजनिक भएपछि दाङ प्रहरीले मुख्य आरोपितलाई पक्राउ गरेको छ।
जिल्ला प्रहरी कार्यालय दाङका प्रवक्ता प्रहरी नायब उपरीक्षक (डीएसपी) डा. हेमराज केसीका अनुसार तुलसीपुर उपमहानगरपालिका–२ भंके निवासी २४ वर्षीय रमेश ठाडा मगरलाई इलाका प्रहरी कार्यालय तुलसीपुरबाट खटिएको प्रहरी टोलीले पक्राउ गरेको हो।
प्रहरीका अनुसार सामाजिक सञ्जालमा सार्वजनिक भएको भिडियोमा रमेशले एक युवतीलाई जंगल क्षेत्रमा लगेर खुकुरी देखाई डरधम्की दिने, कुटपिट गर्ने तथा अपमानजनक शब्द प्रयोग गरेको देखिएको थियो। भिडियो सार्वजनिक भएसँगै घटनाको व्यापक आलोचना भएपछि प्रहरीले तत्काल अनुसन्धान अघि बढाएको थियो।
प्रहरी टोलीले उनलाई घरबाटै पक्राउ गर्ने क्रममा विभिन्न प्रकारका लागुऔषधजन्य ट्याब्लेटसमेत बरामद गरेको जनाएको छ। घटनामा संलग्न रहेको आरोपमा तुलसीपुरकै २१ वर्षीय जिबराज खत्रीलाई पनि नियन्त्रणमा लिइएको छ।
प्रवक्ता केसीका अनुसार पीडित युवतीको स्वास्थ्य अवस्था सामान्य रहेको छ भने घटनासम्बन्धी थप अनुसन्धान जारी छ। प्रारम्भिक अनुसन्धानका आधारमा पक्राउ परेका व्यक्तिविरुद्ध सार्वजनिक अपराध, अभद्र व्यवहार, कुटपिट, धम्की तथा लागुऔषधसम्बन्धी कसुरसहित विभिन्न प्रकृतिका मुद्दा आकर्षित हुन सक्ने प्रहरीको भनाइ छ।
घटनाको भिडियो सामाजिक सञ्जालमा भाइरल भएपछि दोषीमाथि कडा कारबाहीको माग गर्दै सर्वसाधारणले चर्को आलोचना गरेका थिए। महिलामाथि हुने हिंसा तथा दुर्व्यवहारका घटनामा शून्य सहनशीलताको नीति अपनाइने भन्दै प्रहरीले कानुनी प्रक्रियाअनुसार आवश्यक कारबाही अघि बढाइएको जनाएको छ।
प्रहरीले सामाजिक सञ्जालमा हिंसा, धम्की वा आपराधिक गतिविधि झल्किने सामग्री सार्वजनिक गर्नु आफैंमा गम्भीर विषय भएको उल्लेख गर्दै यस्ता घटनाबारे जानकारी भए तत्काल प्रहरीलाई सूचित गर्न सर्वसाधारणलाई आग्रह गरेको छ।
