कृष्ण कुँवर अबुधाबी — अबुधाबीस्थित नेपाली दूतावासले फ्लाइदुबईले आगामी २३ सेप्टेम्बर २०२६ देखि दुबई–पोखरा अन्तर्राष्ट्रिय विमानस्थलबीच दैनिक सिधा उडान सञ्चालन गर्ने घोषणा गरेकोमा स्वागत गरेको छ।
दूतावासका अनुसार संयुक्त अरब इमिरेट्स (यूएई) बाट पोखरा मार्गमा सेवा सञ्चालन गर्ने पहिलो वायुसेवा कम्पनीका रूपमा फ्लाइदुबईको यो पहलले नेपाल र यूएईबीचको हवाई सम्पर्कलाई थप सुदृढ बनाउनेछ। यसबाट नेपालको प्रमुख पर्यटकीय गन्तव्य पोखरा तथा अन्नपूर्ण क्षेत्रसम्मको पहुँच सहज भई पर्यटन प्रवर्द्धनमा महत्वपूर्ण योगदान पुग्ने अपेक्षा गरिएको छ।
दूतावासले यस नयाँ हवाई सम्पर्कलाई दुवै देशबीच पर्यटन, व्यापार तथा जनस्तरीय सम्बन्ध विस्तार गर्ने सकारात्मक कदमका रूपमा लिएको जनाएको छ। फ्लाइदुबई र यूएई पक्षबाट देखाइएको प्रतिबद्धताप्रति प्रशंसा व्यक्त गर्दै यसबाट दुवै देशले पारस्परिक लाभ प्राप्त गर्ने विश्वास व्यक्त गरेको छ।
यसैबीच, पोखरा अन्तर्राष्ट्रिय विमानस्थलबाट दुबईका लागि सिधा व्यावसायिक उडान सञ्चालन गर्न फ्लाइदुबईले आवश्यक अनुमति प्राप्त गरेको छ। अनुमति अनुसार बोइङ ७३७ विमान हरेक दिन बिहान ८:०५ बजे पोखरा अन्तर्राष्ट्रिय विमानस्थलमा अवतरण गर्नेछ भने ९:०५ बजे दुबईका लागि प्रस्थान गर्नेछ।
आगामी असोज ७ गते (सेप्टेम्बर २३, २०२६) देखि सुरु हुने उक्त सेवा प्रारम्भिक रूपमा एक महिनासम्म दैनिक उडान सञ्चालन हुने छ। यसले पोखरा अन्तर्राष्ट्रिय विमानस्थलको अन्तर्राष्ट्रिय हवाई सम्पर्क विस्तार गर्दै पर्यटन, व्यापार तथा यात्रु आवागमनमा महत्वपूर्ण टेवा पुग्ने अपेक्षा गरिएको छ।
दूतावासले यो सेवा नेपाल र यूएईबीच अझ बलियो सम्बन्ध निर्माण गर्ने दिशामा महत्वपूर्ण सुरुआत हुने विश्वास व्यक्त गरेको छ।
