काठमाडौँ । नेपाली कांग्रेसले क्रियाशील सदस्यता अद्यावधिक अभियानअन्तर्गत हालसम्म पाँच लाख ३८ हजार ६२२ सदस्यले वडा सभापतिमार्फत डिजिटल परिचयपत्र प्राप्त गरिसकेको जनाएको छ। पार्टीका अनुसार योग्य ठहरिएका सात लाख ८२ हजार २०९ क्रियाशील सदस्यमध्ये ठूलो सङ्ख्याले अद्यावधिक प्रक्रिया पूरा गरिसकेका छन्।
पार्टीले शुक्रबार जारी गरेको विज्ञप्तिअनुसार हालसम्म एक लाख ४९ हजार ३०९ सदस्यले स्वयम् अद्यावधिक फाराम पेश गरिसकेका छन्। ती सदस्यहरूको विवरण सम्बन्धित वडा सभापतिमार्फत प्रमाणीकरण तथा अद्यावधिक गर्ने प्रक्रिया जारी रहेको जनाइएको छ।
यसअघि क्रियाशील सदस्यता अद्यावधिकका लागि यही जेठ २८ गते राति १२ बजेसम्मको समयसीमा तोकिएको भए पनि अर्को सूचना जारी नभएसम्म सदस्यता वितरण तथा अद्यावधिकको म्याद थप गरिएको कांग्रेसले जनाएको छ। पार्टीले सबै योग्य सदस्यलाई प्रक्रियामा सहभागी हुन आग्रह गर्दै अद्यावधिक अभियानलाई थप व्यवस्थित रूपमा अघि बढाइने जनाएको छ।
