काठमाडौँ । प्रतिनिधिसभामा भएको अमर्यादित गतिविधि तथा भौतिक क्षतिको घटनाबारे छानबिन गर्न सभामुख डोलप्रसाद अर्यालले तीन सदस्यीय समिति गठन गर्नुभएको छ।
सोमबार बसेको प्रतिनिधिसभा बैठकमा सभामुख अर्यालले घटनाको सत्यतथ्य जाँचबुझ गरी ७ दिनभित्र प्रतिवेदन पेश गर्ने जिम्मेवारीसहित समिति गठन गरिएको जानकारी गराउनुभयो।
समितिको संयोजकमा संघीय संसद् सचिवालयका सचिव प्रकाश अधिकारी रहनुभएको छ। समितिका सदस्यमा संघीय संसद्को आन्तरिक सेवा तथा योजना व्यवस्थापन महाशाखाका प्रमुख तथा प्रविधि व्यवस्थापन महाशाखाका प्रमुखलाई राखिएको छ।
सभामुख अर्यालका अनुसार प्रतिनिधिसभाको २०८२ जेठ १७ गतेको बैठकका क्रममा केही सांसदहरूले सदनको कार्य सञ्चालनमा अवरोध सिर्जना गर्दै अमर्यादित तथा आपत्तिजनक व्यवहार प्रदर्शन गरेका थिए। उक्त घटनाका क्रममा सदनमा भौतिक क्षति समेत पुगेको प्रारम्भिक विवरण प्राप्त भएको उहाँले बताउनुभयो।
प्रतिनिधिसभा नियमावली, २०८३ को नियम ३३ को उपनियम (४) बमोजिम घटनाबारे विस्तृत जानकारी प्राप्त भएको र सो सम्बन्धमा मुचुल्का समेत तयार भइसकेको उल्लेख गर्दै सभामुखले थप अनुसन्धान तथा तथ्य संकलनका लागि समिति गठन गरिएको जानकारी दिनुभयो।
समितिले घटनाको विस्तृत अध्ययन, क्षतिको मूल्यांकन तथा संलग्न पक्षहरूको भूमिका सम्बन्धमा जाँचबुझ गरी सात दिनभित्र सभामुखसमक्ष प्रतिवेदन पेश गर्नेछ। उक्त प्रतिवेदनका आधारमा आवश्यक थप निर्णय तथा कारबाही प्रक्रिया अघि बढाइने अपेक्षा गरिएको छ।
