भक्तपुर । प्रतिनिधिसभा सदस्य तथा राष्ट्रिय स्वतन्त्र पार्टी (रास्वपा)का नेता राजिब खत्री ले नेपालको सीमा विवादसम्बन्धी बहसले संसदमा नयाँ अध्याय सुरु गरेको बताएका छन्।
सामाजिक सञ्जालमार्फत आफ्नो धारणा सार्वजनिक गर्दै सांसद खत्रीले प्रधानमन्त्रीले संसदमा लिपुलेक–लिम्पियाधुरा र कालापानी क्षेत्रको विषय उठाउँदै समाधानको सन्दर्भमा बेलायतको ऐतिहासिक भूमिकाबारे प्रश्न उठाएको उल्लेख गरेका छन्। उनका अनुसार यसले नेपालको सीमासम्बन्धी बहसलाई नयाँ दिशातर्फ अघि बढाएको छ।
खत्रीले आजदेखि नेपालको वास्तविक सीमाना, ऐतिहासिक नक्सा तथा त्यससँग सम्बन्धित अन्तर्राष्ट्रिय सम्झौताहरूको विषय संसदभित्र औपचारिक रूपमा प्रवेश गरेको बताएका छन्। सीमा समस्याको दीर्घकालीन समाधान खोज्न विगतका सन्धि, समझदारी र ऐतिहासिक दस्तावेजहरूको गम्भीर समीक्षा आवश्यक रहेको उनको धारणा छ।
उनले निष्पक्ष र निर्भीक ढंगले बहस अघि बढे बेलायतसँग भएका ऐतिहासिक सम्झौतादेखि नेपाल–भारतबीच भएको सन् १९५० को शान्ति तथा मैत्री सन्धिको धारा ८ सम्मका विषय पुनः चर्चामा आउन सक्ने बताएका छन्। साथै, नेपालको सीमा निर्धारणसँग सम्बन्धित ऐतिहासिक प्रक्रियामा बेलायतको भूमिकाबारे थप खोजबिन र बहस हुनुपर्ने आवश्यकता पनि औंल्याएका छन्।
सांसद खत्रीले नेपालको राष्ट्रिय हित, ऐतिहासिक तथ्य र अन्तर्राष्ट्रिय कानुनका आधारमा सीमासम्बन्धी विषयको समाधान खोजिनु नै अहिलेको बहसको सबैभन्दा सकारात्मक पक्ष भएको बताएका छन्। उनका अनुसार संसदमा सुरु भएको यो बहसले नेपालको सीमा सम्बन्धी मुद्दामा थप स्पष्टता र राष्ट्रिय सहमतिको आधार तयार गर्न मद्दत पुग्ने अपेक्षा गरिएको छ।
