काठमाडौं । राष्ट्रिय सभाले आज निर्वाचन प्रणालीलाई थप व्यवस्थित र प्रभावकारी बनाउने उद्देश्यले ल्याइएका दुई महत्त्वपूर्ण विधेयकमाथि छलफल गरी पारित गर्ने तयारी गरेको छ। संघीय संसद् सचिवालयले सार्वजनिक गरेको कार्यसूचीअनुसार प्रतिनिधि सभाबाट सन्देशसहित प्राप्त ‘प्रतिनिधि सभा सदस्य निर्वाचन (पहिलो संशोधन) विधेयक, २०८३’ र ‘मतदाता नामावली (पहिलो संशोधन) विधेयक, २०८३’ माथि सदनमा छलफल गरी पारित गरिने भएको हो।
राष्ट्रिय सभाको बैठक बिहान ११ः१५ बजे बस्ने तय भएको छ। बैठकमा प्रधानमन्त्री तथा गृहमन्त्री वालेन्द्र शाहले प्रतिनिधि सभाबाट सन्देशसहित प्राप्त ‘प्रतिनिधि सभा सदस्य निर्वाचन (पहिलो संशोधन) विधेयक, २०८३’ माथि दफावार छलफल गरियोस् भन्ने प्रस्ताव प्रस्तुत गर्ने कार्यसूची रहेको छ। उक्त प्रस्तावमाथि छलफल सम्पन्न भएपछि विधेयकलाई पारित गरियोस् भन्ने अर्को प्रस्ताव पनि सदनमा प्रस्तुत गरिनेछ।
यसैगरी, निर्वाचन व्यवस्थापनसँग प्रत्यक्ष सम्बन्ध राख्ने ‘मतदाता नामावली (पहिलो संशोधन) विधेयक, २०८३’ माथि पनि राष्ट्रिय सभामा छलफल हुने भएको छ। प्रतिनिधि सभाबाट स्वीकृत भई आएको उक्त विधेयकलाई आजै पारित गर्ने कार्यसूची तय गरिएको संसद् सचिवालयले जनाएको छ। विधेयकमार्फत मतदाता नामावली अद्यावधिक, व्यवस्थापन तथा निर्वाचन प्रक्रियालाई थप पारदर्शी र प्रविधिमैत्री बनाउने व्यवस्था समेटिएको बताइएको छ।
निर्वाचनसम्बन्धी कानुनी संरचनामा सुधार ल्याउने उद्देश्यले सरकारले दुवै विधेयक अघि बढाएको हो। विधेयक पारित भएपछि आगामी निर्वाचनहरूलाई थप व्यवस्थित, विश्वसनीय र समावेशी बनाउन सहयोग पुग्ने अपेक्षा गरिएको छ। निर्वाचन आयोगले समेत समयानुकूल कानुनी सुधार आवश्यक रहेको बताउँदै आएको छ।
आजको बैठकमा विधेयकसम्बन्धी कार्यसूचीका अतिरिक्त सांसदहरूले आकस्मिक समय, शून्य समय र विशेष समयमा समसामयिक राष्ट्रिय मुद्दामाथि धारणा राख्ने कार्यक्रम पनि रहेको छ। यस क्रममा जनसरोकारका विषय, विकास निर्माण, सुशासन, सेवा प्रवाह तथा समसामयिक राजनीतिक घटनाक्रमबारे सांसदहरूले सरकारको ध्यानाकर्षण गराउने अपेक्षा गरिएको छ।
राष्ट्रिय सभाको आजको बैठकलाई चालु अधिवेशनको महत्त्वपूर्ण बैठकका रूपमा हेरिएको छ। निर्वाचनसँग सम्बन्धित कानुन संशोधनका विषयमा हुने छलफल र निर्णयले आगामी राजनीतिक तथा निर्वाचन प्रक्रियामा दूरगामी प्रभाव पार्ने विश्वास गरिएको छ।
