काठमाडौं। लोकतान्त्रिक समाजवादी पार्टी (लोसपा)का नेता लक्ष्मणलाल कर्णले प्रधानमन्त्री शेरबहादुर देउवाको भारत भ्रमणको केही एजेन्डा छ भने जनतालाई जानकारी दिनुपर्ने बताएका छन् ।
नेपाली रेडियो नेटवर्क (एनआरएन) को कार्यक्रम नेपाली बहसका लागि पत्रकार ऋषि धमलासँग कुरा गर्दै नेता कर्णले भने, “प्रधानमन्त्रीको भारत भ्रमणको एजेन्डा के हो ? सरकारले के तयारी गरेको छ, बाहिर आएको छैन ।
यसबारे त सर्वदलीय बैठक गर्नुपर्ने हो । देशको एजेन्डामा सबैसँग छलफल र सरसल्लाह लिनुपर्छ । प्रधानमन्त्रीले केही एजेन्डा छ भने जनतालाई जानकारी गराउनुपर्छ ।”
प्रधानमन्त्रीले कुनै सम्झौता गर्दा भोलि विरोध नहोस् भनेर सतर्क हुनुपर्ने उनको धारणा छ । उनले भने, “दुई देशका प्रधानमन्त्री भेट्नु सुखद कुरा हो । यसले सम्बन्धका रेखा कोर्छ । तर त्यहाँ कुनै निर्णय हुँदा नेपालको पक्षमा होस्, नेपालको स्वार्थमा होस् । कुनै सम्झौता गरेर आएर भोलि ठगियौँ भन्ने नपरोस्, विरोध नहोस् ।”
नेता कर्णले संसद् नचल्दा जनताका समस्या राख्न नपाएको पनि बताए । उनले थपे, “दुई चोटि संसद् पुनःस्थापना भयो, दुवै पटक संसद् चलेको छैन । अहिले हामी बोल्ने तपाईं मिडियाहरुसँग मात्र हो । जनता चारपाँच दिनअघि मलखादका लागि रोएका थिए, अब शीतलहरका लागि रोइरहेका छन् ।”
जनता शीतलहरले पीडित हुँदा राजनीतिक पार्टी, स्थानीय सरकार र प्रदेश सरकार कहाँ छन् भन्ने पत्रकार धमलाको प्रश्नमा उनले भने, “जनताको सबैभन्दा नजिक स्थानीय सरकार हुन्छन् । तिनले पीडितलाई तुरुन्त हेर्नुपर्छ, राहत दिनुपर्छ । अहिले जनताको जीवन रक्षा नै धर्म हो । प्रदेश सरकारले पनि न्यानो लुगा, तातो खाना, विपद्को व्यवस्थापनको पूर्वतयारी गर्नुपर्ने हो । तपाईंले खोज्नुभयो भने मुख्यमन्त्री पनि कहीँ न कहीँ भेटिनु होला ।”
