काठमाडौं । प्रतिनिधि सभाको बैठकमा माननीय डा. गंगा लक्ष्मी अवालले बालबालिकामा बढ्दो स्क्रिन टाइमका कारण उत्पन्न भइरहेका मानसिक तथा शारीरिक समस्याप्रति सरकारको गम्भीर ध्यानाकर्षण गराउनुभएको छ।
बैठकमा उहाँले मोबाइल, ट्याबलेट, कम्प्युटर तथा अन्य डिजिटल उपकरणको अनियन्त्रित प्रयोगले बालबालिकाको स्वास्थ्य, व्यवहार र सामाजिक विकासमा नकारात्मक असर पार्न सक्ने बताउनुभयो।
अवालले सामाजिक सञ्जाल तथा हिंसात्मक गेममा बालबालिकाको बढ्दो पहुँचले साइबर अपराध, साइबर दुर्व्यवहार तथा बाल यौन दुर्व्यवहारको जोखिमसमेत बढाइरहेको विषय उठाउनुभयो। बालबालिकाले इन्टरनेटमा उपभोग गर्ने सामग्रीप्रति पर्याप्त निगरानी नहुँदा उनीहरू विभिन्न जोखिममा पर्न सक्ने उहाँको भनाइ थियो।
उहाँले बालबालिकालाई डिजिटल प्रविधिबाट पूर्ण रूपमा अलग गर्नु समाधान नभएको भन्दै सुरक्षित र जिम्मेवार डिजिटल प्रयोगका लागि अभिभावकीय निगरानी, सचेतना र मार्गदर्शन आवश्यक रहेको बताउनुभयो।
बालबालिकाको हित र सुरक्षालाई प्राथमिकतामा राख्दै सरकारले समयमै प्रभावकारी नीति, नियमन तथा नियन्त्रणको व्यवस्था गर्नुपर्नेमा जोड दिँदै अवालले डिजिटल माध्यमबाट सिर्जना हुन सक्ने जोखिम न्यूनीकरणका लागि राज्यका सम्बन्धित निकाय सक्रिय हुनुपर्ने आग्रह गर्नुभयो।
