काठमाडौं, नेकपा एमालेमा विरासतको राजनीति सुरु हुने भएको छ ।
राष्ट्रपति विद्यादेवी भण्डारी र एमालेका दिवंगत महासचिव मदन भण्डारीकी जेठी छोरी उषाकिरण भण्डारीलाई दशौं महाधिवेशनमा पदाधिकारी बनाउने तयारी भएको हो ।
उषाकिरणले राजनीतिमा आउन आधार तयार गरिसकेकी छिन् । उनी अखिल नेपाल महिला संघकी केन्द्रीय सदस्य हुन् । संघमा विगतमा विद्या भण्डारी अध्यक्ष थिइन् ।
एमाले अध्यक्ष केपी शर्मा ओली पनि उषाकिरणलाई राजनीतिमा अगाडि बढाउन तयार भएको बुझिएको छ । उनलाई सकभर सचिव बनाउने गरी तयारी भएको हो ।
एमालेको राजनीतिमा प्रभाव बनाउँदै आएको मदन भण्डारी फाउण्डेशनमा उषाकिरण अध्यक्ष छिन् । उनलाई राजनीतिमा ल्याउनकै लागि राष्ट्रपति भण्डारीले वर्षौ देखि त्यही अनुसारको स्कुलिङ गर्दै आइन् । उषाकिरण दिल्लीस्थित जवाहरलाल नेहरु विश्वविद्यालयबाट एमए गरेकी छिन् ।
