काठमाडौ । आइएमईले आउँदो दसैँ–तिहारलागयतका पर्व लक्षित ‘दसैँमा डबलको डबलको डबल अफर’ नामक प्रवद्र्धनात्मक योजना सार्वजनिक गरेको छ । कम्पनीले कात्तिक २६ गतेसम्मका लागि यो अफर ल्याएको हो ।
योजनाअनुसार विदेशबाट पठाइएको रकम आइएमईका एजेन्ट वा आइएमई पे मोबाइल वालेटमा प्राप्त गर्दा अथवा बैंक ट्रान्सफर गर्दा हरेक हप्ता दुईजनालाई पठाएको रकमको दुई गुणा रकम प्रदान गरिने भएको छ । त्यस्तै, हरेक महिना दुईजनालाई पठाएको रकमको डबलको डबल अर्थात् चार गुणा र बम्परमा एकजना भाग्यशाली सेवाग्राहीलाई पठाएको रकमको डबलको डबलको डबल अर्थात् आठ गुणा रकम पुरस्कारस्वरूप प्रदान गरिने कम्पनीले जनाएको छ ।
साथै, आइएमई पेमा रकम प्राप्त गर्दा दुई सय रुपैयाँ थप बोनसको व्यवस्था मिलाइएको कम्पनीले जनाएको छ । अफर सार्वजनिक गर्दै आइएमई लिमिटेडका प्रमुख कार्यकारी अधिकृत सुमन पोखरेलले समय–समयमा ल्याइने यस्ता अफरहरूले कम्पनी र सेवाग्राहीबीचको सम्बन्धलाई अझै मजबुत बनाउन फलदायी हुने विश्वास व्यक्त गरे ।
आइएमईका महाप्रबन्धकद्वय खिलेन्द्र पौडेल र रुद्रराज पौडेलले कम्पनीले समय–समयमा प्रस्तुत गर्ने अफरहरूलाई आम सेवाग्राहीहरूको पहुँचसम्म पुर्याउन व्यावसायिक साझेदारहरूको महत्वपूर्ण भूमिका हुने बताएका थिए । ब्रान्ड एम्बेसडरद्वय दीपकराज गिरी र दीपाश्री निरौलाले आइएमईले व्यवसायका अतिरिक्त सामाजिक क्षेत्रमा पनि महत्वपूर्ण योगदान पुर्याउँदै आएको उल्लेख गर्दै गत वर्ष कोरोना महामारीका समयमा आइएमईले सञ्चालन गरेको भरोसा कोषको स्मरण गरेका थिए ।
लक्की ड्रमार्फत विजेता छनोट हुने यो योजनामा आइएमईका संस्थापक, आइएमई ग्रुपमा कार्यरत कर्मचारीहरू, आइएमईका व्यावसायिक साझेदार (एजेन्ट पार्टनर) तथा आइएमई सम्बद्ध कुनै पनि व्यक्ति यो योजनामा सहभागी हुन नपाउने कम्पनीले जनाएको छ ।
