नेपालले आइसिसी विश्वकप लिग–२ अन्तर्गत पहिलो खेलमा सोमबार अमेरिकासँग खेल्दैछ । खेल नेपाली समय अनुसार दिउँसो ४ : १५ पछि ओमानको अल अमरेत क्रिकेट मैदानमा सुरु हुनेछ ।
त्रिकोणात्मक सिरिजअघि नेपाल र अमेरिका दुबैले पपुवा न्युगिनीसँग २-२ ओडिआई खेल खेलेका थिए । नेपाल र अमेरिकाले पपुवा न्युगिनीसँग दुबै खेलमा जित हात पारेका थिए । अमेरिका गतवर्ष टियु मैदानमा विश्वकप लिग–२ दुबै खेलमा नेपालसँग पराजित भएको थियो । गतवर्ष दोस्रो खेलमा नेपालले अमेरिकालाई ओडिआई इतिहासकै सर्वाधिक कम ३५ रनमा अल आउट गर्दै विश्वमै सनसनी मच्चाएको थियो ।
विश्वकप लिग–२ मा अमेरिका १२ खेलमा ६ मा जित र ६ मा हार सहित कुल १२ अंकका साथ दोस्रो स्थानमा छ । नेपाल ४ खेलमा समान २ मा जित र हार सहित चार अंकका साथ छैटौं स्थानमा छ । नेपाल शतप्रतिशत जितका साथ ८ अंक थप्दै अंक तालिकामा ठूलो छलाङ मार्ने सोचमा छ । अमेरिका उच्च प्रदर्शनका साथ शीर्ष स्थानमा पुनरागमन गर्न चाहन्छ ।
गतवर्ष नेपालसँग लज्जास्पद हार बेहोरेको अमेरिकाले यस पटक टोलीमा व्यापक परिवर्तन गरेको छ । टोलीमा ६ परिवर्तन गरेको अमेरिका नेपालविरुद्ध गतवर्ष ३५ रनमा अल आउटको बदला लिन चाहन्छ । भारतीय मूलका खेलाडीको बाहुल्यता हुँदा अमेरिका टोली मजबुत छ । अमेरिका पाँच खेलाडी जो नेपाललाई निराश बनाउन सक्छन् ।
५. सौरभ नेत्रवालकर
उनले अमेरिकाबाट १५ ओडिआई, ८ टि ट्वान्टी र ४७ लिष्ट ए खेलेका छन् । ओडिआईमा २३ विकेट लिएका छन् । उत्कृष्ट प्रदर्शन ५–३२ छ । भारतीय घरेलु क्रिकेटको राम्रो अनुभव भएका उनले आफ्नो उच्च प्रदर्शनमा नेपालको जितको सपनामा बाधक बन्न सक्छन् ।
४.निसर्ग पटेल
३. स्टिभ टेलर
सन् २०१३ डिभिजन ३ मा टेलरले नेपालविरुद्ध १ सय २ बलमा १२ चौका र १२ छक्का सहित १ सय ६२ रनको विष्फोटक शतकीय इनिङ खेलेका थिए । टेलरको विष्फोटक शतकमा अमेरिकाले ५० ओभरमा ६ विकेट गुमाउँदै ३ सय ६६ रन बनाएको थियो । नेपालविरुद्ध उनलाई राम्रो अनुभव छ । राम्रो लयमा पनि देखिएका छन् । पिएनजीसँगको पहिलो खेलमा टेलरले ५५ बलमा ७ चौका र ७ छक्का सहित ८२ रनको आक्रामक इनिङ खेलेका थिए । टेलर पार्टटाइम बलर पनि हुन् । नेपालविरुद्ध राम्रो अनुभव, उनको लय र खेल्ने शैली देख्दा अमेरिका नायक बन्न सक्छन् ।
२.अभिषेक पराडकार
भारतीय मुलका अभिषेक पराडकार बायाँ हाते तीव्र गतिका बलर हुन् । २० वर्षिय अभिषेकले पिएनजीसँग दोस्रो ओडिआई खेलमा अमेरिकाको लागि डेब्यू गर्दै ९ ओभरमा २ मेडन सहित ४ विकेट लिएका थिए । अभिषेकले हालसम्म नेपालसँग खेलेका छैनन् । उनी नयाँ अनुहार हुँदा धेरैलाई उनको बारे थाहा छैन । उनले भारतको हैदराबादबाट यू१६ क्रिकेट खेलि सकेका छन् । अभिषेक नेपाललाई सरप्राइज बन्न सक्छन् ।
१. जसकरण मल्होत्रा
मध्यक्रमका विकेटकिपर ब्याट्सम्यान जसकरण मल्होत्रामाथि सबैको नजर हुने छ । भारतीय मुलका मल्होत्राले पिएनजीसँग दोस्रो ओडिआई खेलमा १ सय २४ बलमा ४ चौका र १६ छक्का सहित १ सय ७३ रनको अविजित इनिङ खेल्दै विश्वको ध्यान आफूतिर तानेका थिए । उक्त इनिङ खेल्नेक्रममा उनले ६ बलमा लगातार ६ छक्का प्रहार गरेका थिए । पाँचौं नम्बरमा ब्याटिङ गर्दै बनाएको उक्त रन ओडिआई इतिहासकै सर्वाधिक ठूलो पर्दछ ।
जसकरण गतवर्ष नेपाल भ्रमणमा अमेरिका टोलीमा थिएनन् । पिएनजीविरुद्ध लयलाई निरन्तरता दिएमा नेपाली बलरलाई उनले निराश बनाउन सक्छन् । भारतको चन्डिगढमा जन्मिएका उनले हिमान्चल प्रदेशबाट घरेलु क्रिकेट खेलेका थिए । उनले २०१८ देखि अमेरिकाबाट खेल्दै आएका छन् । उनले नेपालविरुद्ध पहिलो पटक खेल्दै छन् । जसले गर्दापनि बलरलाई केहि कठिन पर्न सक्छ ।
