काठमाडौं । परम्परागत पार्टीहरू असफल भएको भन्दै वैकल्पिक राजनीतिको बाटो अंगालेको विवकेशील साझा पनि पुरानै दलहरू जस्तै आन्तरिक कलहमा फसेको छ । सुरुवातमा मिश्रले ल्याएको प्रस्तावको विपक्षमा उभिएको समूह बलियो देखिए पनि पछिल्ला गतिविधिहरूले पार्टीभित्र मिश्र पक्ष हाबी हुँदै गएको देखिन्छ ।
अध्यक्ष मिश्रले सहमतिमा आउन नसक्ने भए कम क्षतिमा अलग हुने बाटोमा अघि बढ्न सुझाइसकेका छन् । तर संयोजक मिलन पाण्डेको नेतृत्वमा रहेको समूह पार्टीको पुरानै लाइन छाड्न नहुने र पार्टी विभाजन पनि गर्न नहुने अडानमा छ । बरु पाण्डे पक्षमा खुलेका सचिवालय सदस्य केशव दाहालले विवाद समाधानका लागि वैकल्पिक प्रस्ताव अघि सारेका छन् ।
दाहालको प्रस्ताव अनुसार अहिलेको विवाद समाधानका लागि पहिलो विकल्प भनेको दुवै दस्तावेजलाई पार्टीमा प्रवेश नगराउने हो । ‘यत्रो ठूलो राजनीतिक मुद्दामा एक महीना छलफल गरेर काहीँ पुगिँदैन, त्यसैले पहिले बाहिरै छलफल गरौं भन्ने हो’ दाहालले भने, ‘तत्काल पार्टीलाई हिजो एकीकरण हुँदाको स्पिरिटअनुसार अघि बढाउनुपर्छ ।’
दोस्रो प्रस्ताव चाहिँ पार्टीभित्र देखिएका विवादित विषयलाई छाड्नुपर्ने र एउटा कार्यदल बनाएर दुवै दस्तावेजका अधिकतम स्वीकार्य विषयलाई समेटेर अघि बढ्ने भन्ने हो । यसको अर्थ मिश्र पक्ष तत्काललाई ‘मार्ग परिवर्तनको प्रस्ताव’ बाट पछि हट्नुपर्ने भन्ने हुन्छ । अध्यक्ष मिश्र र संयोजक दुवैले महाधिवेशनसम्म पद छाड्ने र अर्को समूहले नेतृत्व गर्ने दाहालले अघि सारेको तेस्रो प्रस्ताव हो ।
