आफ्नै घरमा आफ्नै नामबाट टेबल टेनिस एकेडेमी खोलेकी अनिता महर्जनको सपना आफूभन्दा राम्रो खेलाडी उत्पादन गर्नुरहेको छ।
काठमाण्डूको सामाखुशीस्थित सडकमै जोडिएको घरको भुइँतल्लामा छ अनिता महर्जनले खोलेको ‘एनिज् पिङ्पङ क्लब’।
आफ्नो नामबाट अनिताको भन्ने जनाउने ‘एनिज्’ र चिनियाँ भाषाबाट आएको टेबल टेनिस जनाउने ‘पिङ्पङ’बाट उनले उक्त प्रशिक्षणगृहको नाम जुराएकी हुन्।
उनको क्लबमा टेबल टेनिस सिक्न आउने ससाना नानीहरूको भिड लाग्ने गर्छ।
खेलाउने तरिका पनि नयाँ छ। साना नानीहरू एरोबिक्स गर्दै टेबल टेनिस प्रशिक्षण लिन्छन्।
१३ वर्षीया खेलाडी जसले टोक्योमा स्वर्ण पदक जितेर इतिहास रचिन्
नामै नसुनिएका यी किशोरले ओलिम्पिक्सको पौडीमा स्वर्ण जितेर सबैलाई छक्क पारे
खेलाडीहरूको खेलमा लचकता आउने भनिएको एरोबिक्ससँगै टेबल टेनिस प्रशिक्षणको यो शैली नेपालमा पहिलो पटक सुरु गरिएको हो।
अनि त्यसलाई भित्र्याएकी हुन् अन्तर्राष्ट्रिय टेबल टेनिस खेलाडी अनिता महर्जनले।
झन्डै डेढ दशक निरन्तर टेबल टेनिस खेलेपछि उनले आफ्नै नाममा खेल प्रतिष्ठान खोलेकी हुन्।
विश्व टेबल टेनिस दिवसका दिन पारेर अनिताले आफ्नै आमाबुबाको हातबाट एकेडेमीको उद्घाटन गरिन्।
अन्तर्राष्ट्रिय टेबल टेनिस महासङ्घ (आईटीटीएफ) ले उनको कार्यलाई सराहना गर्दै बधाई दियो र उनको कामलाई आफ्नो वेबसाइटमा प्रचार गर्यो।
सुरुमै उनको एकेडेमीले अन्तर्राष्ट्रिय चर्चा पायो।
