झापा जिल्लाकै विकट गाउँ भनेर परिचित पिन्डलबारीलाइ सरकारले वास्ता नगरेका कारण सास्ती झेल्नु परेको छ ।दक्षिणी झापाको कचनकवल गाउँपालिका–१ स्थित पिन्डलबारीका स्थानीयवासीले हरेक बर्खायाममा सास्ती झेल्नु परेको हो ।
भारतीय सीमावर्ती नाकासँग जोडिएको पिन्डलबारीवासीको पीडादायी समस्याबारे दशकौं बित्दा समेत कुनै पनि दल नेतृत्वको सरकारले सम्बोधन नगरेपछि उनीहरु समस्यमा पर्दै आइरहेका छन् । पिन्डलबारीलाई पश्चिम र दक्षिणतर्फ भारतीय सिमाना र पूर्वपट्टि बिरिङ खोलाले घेरेको छ । डुबानको समेत उच्च जोखिममा रहेका गाउँवासी बर्खाको बेला सामान्य औषधि उपचार, सरकारी सेवा वा अन्य काम विशेषले गाउँबाट बाहिर जानु परे भने बिरिङ खोलाबाट जोखिमपूर्ण यात्रा गर्दै आइरहेको स्थानीय भार्दुलाल राजवंशीले बाताए ।
निर्वाचनको बेला मात्र नेताहरु भोट माग्न पिन्डलबारी जाने गरेको राजवंशीको गुनासो छ । बर्खा याम सुरु भएपछि कोही पनि नेता समस्या बुझ्न गाउँ नआएको उनले आरोप लगाए । बर्खा याम सुरु भएपछि तीन महिना गाउँवासीलाई धेरै समस्या भोग्नु पर्ने भनाइ उनको छ । कतै जानु परे भारतीय बाटो भएर वा खोला तर्न स्थानीयले प्लाष्टिको ठूलो ड्रम र बाँसले बनाएको डुङ्गा चढेर जानुपर्ने उनले जानकारी दिए ।अहिले कोरोना कारण सीमा नाकामा पनि भारतीय एसएसबीले कडाइ गर्दा गाउँले थप समस्यामा परेको उनले गुनासो छ ।
सडक तथा पुलको विकल्प नहुँदा बर्खामा जोखिम मोलेर अस्थायी डुङ्गा सञ्चालन गर्नुपर्ने बाध्यता रहेको डुङ्गा सञ्चालनगर्दै आएका मोहन मण्डलले बाताए । १२ वटा ड्रमको अस्थायी डुङ्गा बनाएर दुःख–सुख जसरी भए पनि गाउँवासीलाई तारिरहेको बताउँदै मण्डलले जनाउँनुभयो । झोलुङ्गे पुल बनाउने कुरा पटक पटक उठ्यो, तर अहिलेसम्म कुनै सुरसार नभएको उनको भनाइ छ । आदिवासी समुदायका बाहुल्यता रहेको पिन्डलबारीमा १४७ घरधुरी रहेका छन् ।बाह्रदशी गाउँपालिकासँग सीमा जोडिएको पिन्डलबारी गाउँसहित दक्षिणी भूभागका गाउँहरूमा बर्खा याममा खोलाले जमिन कटानसँगै डुबान पार्दा स्थानीयले सास्ती झेल्नु परेको बाह्रदशी गाउँपालिका–१ का वडा अध्यक्ष शम्भुसिंह राजवंशीले बाताए । मानिस बिरामी हुँदा सामान्य सिटामोल किन्न समेत जोखिम र सास्ती खेपेर जानु परेको उनले भने ।
पिन्डलबारीबासीको बर्खा यामको समस्या समाधान हुन नसकेको कचनकवल १ नम्बर वडा अध्यक्ष लक्ष्मीनारायण यादवले स्वीकारे । पूर्वसांसद तथा नेपाली कांग्रेसका नेता कृष्णप्रसाद सिटौलाले पिन्डलबारी जाने बिरिङ खोलामा २०७२ सालमा झोलुङ्गे पुलको शिलान्यास गरेका थिए । उनको पालामा त्यो झोलुङ्गे पुल बनेन । त्यसपछि राप्रपाका नेता राजेन्द्रप्रसाद लिङ्देनले यस क्षेत्रबाट प्रतिनिधिसभा सदस्यको चुनाव जितेपछि फेरि झोलुङ्गे पुल बनाउने योजना अघि सारे। सङ्घीय सरकारले पुलको ठेक्का समेत लगाइसकेको छ ।पुलको ठेक्का लागेपछि २०७७ साल फागुनमा प्रतिनिधिसभा सदस्य लिङ्देन, स्थानीय जनप्रतिनिधि, कर्मचारी, निर्माण कम्पनीसहितको टोलीले पुल बनाउने ठाउँको पहिचान गरेका थिए । सिटौलाले शिलान्यास गरेको ठाउँभन्दा अलि पर सोरेर पुल बनाउने पोन्इटको पहिचान गरिएको वडा अध्यक्ष यादवले बताए ।
सङ्घीय मामिला तथा सामान्य प्रशासन मन्त्रालय, स्थानीय पूर्वाधार विभागको स्थानीय पुल शाखाले सो खोलमा झोलुङ्गे पुलको ठेक्का लगाइसकेको शाखाका इन्जिनियर दिनबिनोद खड्काले बताए ।
