काठमाडौं : सत्तारुढ गठबन्धनका नेताहरु साझा कार्यक्रम बनाएर अघि बढने भएका छन्। गठबन्धनले अघि सारेका मुद्दाहरुलाई आधार बनाएर साझा कार्यक्रम बनाउने र त्यसलाई प्राथमिकतामा राखेर सरकार संचालन गर्ने तयारी गरेको हो।
प्रधानमन्त्री तथा नेपाली कांग्रेसका सभापति शेरबहादुर देउवा र नेकपा माओवादी केन्द्रका अध्यक्ष पु्ष्पकमल दाहाल प्रचण्डबिच मंगलवार बालुवाटारमा भएको वार्तामा साझा कार्यक्रम बनाउने सहमति भएको हो। प्रचण्डका प्रेस संयोजक विष्णु सापकोटाले साझा कार्यक्रम बनाउने बारेमा छलफल भएको जानकारी दिए।
‘एउटा साझा कार्यक्रम बनाएर अघि बढने भनेर कुराकानी भएको हो,’ उनले भने।
देउवा पनि साझा कार्यक्रम अनुसार सरकार संचालनका लागि सकारात्मक रहेको प्रचण्ड निकट नेताहरुको दाबी छ। प्रचण्डले आफ्नो पार्टीको स्थायी कमिटीको बैठकमा यसअघि नै उच्चस्तरीय राजनीतिक संयन्त्र बनाउने बारेमा छलफल गरेका थिए। तर, मंगलवारको भेटमा भने उच्चस्तरीय संयन्त्रका बारेमा छलफल नभएको बताइएको छ।
उनले सार्वजनिक रुपमा पनि देउवा नेतृत्वको सरकार गठबन्धनको भावना अनुसार अघि बढने दाबी गर्दै आएका छन्।
साझा कार्यक्रमबाट सरकार संचालन गर्ने विषयमा जनता समाजवादी पार्टीका अध्यक्ष उपेन्द्र यादव पनि सहमत देखिएका छन्। नेकपा एमालेका वरिष्ठ नेता माधव नेपालसँगको छलफलमा पनि यस विषयमा नेताहरुबिच सहमति जुटेको हो।
यस्तै, आजको भेटमा पूर्व प्रधानमन्त्री केपी शर्मा ओली नेतृत्वको सरकारले प्रतिनिधिसभा विघटन (जेठ ८) पछिका असंवैधानिक नियुक्तिहरु खारेज गर्नेबारेमा पनि छलफल भएको थियो। देउवासँगको छलफल अघि प्रचण्डले एमालेका वरिष्ठ नेता नेपाल र जसपाका अध्यक्ष उपेन्द्र यादवबिच भेटवार्ता भएको थियो। उक्त भेटमा प्रतिनिधिसभामा साउन ३ गते प्रधानमन्त्री देउवालाई विश्वासको मत दिएकोबारेमा छलफल भएको थियो।
‘सदनमा भएको उपस्थितिका बारेमा पनि राम्रो समीक्षा भएको छ। यी विषयका आधारमा पनि अघि बढने भन्ने भएको छ,’ उनले भने।
गठबन्धनका नेताहरुबिच देउवा नेतृत्वको मन्त्रिपरिषद विस्तारबारे छलफल भएको थियो। नेपाल समूहलाई पनि सरकारमा सहभागी गराउनेबारे छलफल भए पनि तत्काल नेपाल समूहले भने सरकारमा जान नसकिने बताइएको छ।
मंगलवार विहान भएको प्रचण्ड-नेपाल भेटमा पनि नेपाल समूहलाई सरकारमा सहभागी गराउने बारेमा छलफल भएको थियो। तर, नेपालले भने कानुनी र विभिन्न प्राविधिक कारणले तत्काल सरकारमा जान सम्भव नभएको बताएका थिए।
